Read Bíbélì Mímọ́ ní Èdè Yorùbá Òde-Òní Ìwé Nọ́ḿbà 26 Bible Online

Ìwé Nọ́ḿbà 26 - Bíbélì Mímọ́ ní Èdè Yorùbá Òde-Òní bible

Ìwé Nọ́ḿbà 26

¹ Lẹ́yìn àjàkálẹ̀-àrùn OLÚWA sọ fún Mósè àti Élíásárì ọmọ Árónì, àlùfáà pé

²“Ka iye gbogbo àwọn ọmọ Ísírẹ́lì gẹ́gẹ́ bí ìdílé wọ́n; láti ẹni ogun (20) ọdún àti jù bẹ́ẹ̀ lọ tí ó lè jà lójú ogun ní Ísírẹ́lì.”

³Lórí pẹ̀tẹ́lẹ̀ ti Móábù pẹ̀lú Jọ́dánì tí ó kọjá Jẹ́ríkò, Mósè àti Élíásárì àlùfáà sọ̀rọ̀ pẹ̀lú wọn ó wí pé,

⁴“Ka iye àwọn ọkùnrin tí ó jẹ́ ọmọ ogun (20) ọdún tàbí jù bẹ́ẹ̀ lọ, gẹ́gẹ́ bí OLÚWA ti paláṣẹ fún Mósè.” Èyí ni àwọn ọmọ Ísírẹ́lì tí ó jáde láti Éjíbítì wá:

⁵ Àwọn ọmọ Rúbẹ́nì, àkọ́bí ọmọkùnrin Ísírẹ́lì, láti ẹni ti ìdílé Hánókù, láti ọ̀dọ̀ ẹni tí ìdílé Hánókù ti jáde wá; Láti ìdílé Pálù, láti ọ̀dọ̀ ẹni tí ìdílé àwọn ọmọ Pálù ti jáde wá;

⁶ti Hésírónì, ìdílé àwọn ọmọ Hésírónì; ti Kárímì, ìdílé àwọn ọmọ Kárímì.

⁷Wọ̀nyí ni ìdílé àwọn ọmọ Rúbẹ́nì; àwọn tí a sì kà nínú wọn jẹ́ ẹgbàá mọ́kànlélógún ó lé ẹgbẹ̀sán ó dín àádọ́rin (43,730).

⁸Àwọn ọmọkùnrin Pálù ni Élíábù,

⁹àwọn ọmọkùnrin Élíábù ni Némúélì àti Dátanì àti Ábírámù. Èyí ni Dátanì àti Ábírámù náà tí wọ́n ní òkìkí nínú ìjọ tí ó jẹ́ ọlọ̀tẹ̀ sí Mósè àti Árónì tí ó sì wà lára àwọn ẹgbẹ́ Kórà nígbà tí wọ́n bá OLÚWA jà.

¹⁰Ilẹ̀ sì la ẹnu rẹ̀, ó sì gbé wọn mì pọ̀ pẹ̀lú Kórà, nígbà tí ẹgbẹ́ rẹ̀ kú níbi tí iná ti run àwọn àádọ́tàlérúgba ọkùnrin (250). Tí wọ́n sì di àmì ìkìlọ̀.

¹¹Àwọn ọmọ Kórà, bí ó ti wù kí ó rí, wọn kò kú.

¹²Àwọn ọmọ ìrán Símónì bí ìdílé wọn: ti Némúélì, ìdílé Némúélì; ti Jámínì, ìdílé Jámínì; ti Jákínì, ìdílé Jákínì;

¹³ti Ṣérà, ìdílé Ṣérà; tí Ṣọ́ọ̀lù, ìdílé Ṣọ́ọ̀lù.

¹⁴Wọ̀nyí ni ìdílé àwọn ọmọ Símónì, ẹgbàámọ́kànlá ó lé igba. (22,200) ọkùnrin.

¹⁵Àwọn ọmọ Gádì bí ìdílé wọn: ti Ṣéfónì, ìdílé Ṣéfónì; ti Hágígì, ìdílé Hágígì; ti Ṣúnì, ìdílé Ṣúnì;

¹⁶ti Ósínì, ìdílé Ósíní; ti Érì, ìdílé Érì;

¹⁷ti Árédì, ìdílé Árédì; ti Árólì, ìdílé Árólì.

¹⁸Wọ̀nyí ni àwọn ọmọ Gádì tí iye wọn sì jẹ́ ọ̀kẹ́ méjì ó lé ẹ̀ẹ́dẹ́gbẹ̀ta (40,500).

¹⁹Àwọn ọmọ Júdà ni Érì àti Ónánì, ṣùgbọ́n Érì àti Ónánì kú ní ilẹ̀ Kénánì.

²⁰Àti àwọn ọmọ Júdà gẹ́gẹ́ bí ìdílé wọn: ti Ṣélà, ìdílé Ṣélà; ti Pérésì, ìdílé Pérésì; ti Sérà, ìdílé Ṣérà.

²¹Àwọn ọmọ Pérésì: ti Hésírónì, ìdílé Hésírónì; ti Hámúlù, ìdílé Hámúlù.

²²Wọ̀nyí ni ìdílé Júdà; gẹ́gẹ́ bí àwọn tí a kà nínú wọn tí iye wọn sì jẹ́ ẹgbàá méjìdínlógójì ó lé ẹ̀ẹ́dẹ́gbẹ̀ta. (76,500).

²³Àwọn ọmọ Isákárì gẹ́gẹ́ bí ìdílé wọn: ti Tólà, ìdílé Tólà; ti Púfà, ìdílé Púfà;

²⁴ti Jáṣúbù, ìdílé Jáṣúbù; ti Ṣímírónì, ìdílé Ṣímírónì.

²⁵Wọ̀nyí ni ìdílé Isákárì gẹ́gẹ́ bí àwọn tí a kà nínú wọn tí iye wọn sì jẹ́ ẹgbàáméjìlélọ́gbọ̀n ó léọ̀ọ́dúnrún (64,300).

²⁶Àwọn ọmọ Ṣebúlúnì gẹ́gẹ́ bí ìdílé wọn: ti Sẹ́rẹ́dì, ìdílé Ṣẹ́rẹ́dì; ti Élónì, ìdílé Élónì; ti Jálélì, ìdílé Jálélì.

²⁷Wọ̀nyí ni ìdílé àwọn ọmọ Sebúlúnì gẹ́gẹ́ bí àwọn tí a kà nínú wọn tí iye wọn sì jẹ́ ọ̀kẹ́ mẹ́ta ó lé ẹ̀ẹ́dẹ́gbẹ̀ta (60,500).

²⁸Àwọn ọmọ Jósẹ́fù gẹ́gẹ́ bí ìdílé wọn; Mánásè àti Éfúráímù:

²⁹Àwọn ọmọ Mánásè: ti Mákírì, ìdílé Mákírì (Mákírì sì bí Gílíádì); ti Gílíádì, ìdílé àwọn ọmọ Gílíádì.

³⁰Wọ̀nyí ni àwọn ọmọ Gílíádì: ti Íésérì, ìdílé Íésérì; ti Hélékì, ìdílé Hélékì

³¹àti ti Ásíríẹ́lì, ìdílé Ásíríẹ́lì; àti ti Ṣékémù, ìdílé Ṣékémù;

³²àti Ṣemídà, ìdílé àwọ ọmọ Ṣemídà; àti ti Heférì, ìdílé àwọn ọmọ Héférì.

³³(Selofehádì ọmọ Héférì kò sì ni ọmọkùnrin, bí kò ṣe ọmọbìnrin; orúkọ àwọn ọmọbìnrin Selofehádì ni Málà, Nóà, àti Hógílà, Mílíkà àti Táṣà).

³⁴Wọ̀nyí ni ìdílé Mánásè tí iye wọn sì jẹ́ ẹgbàámẹ́rìndínlọ́gbọ̀n ó lé ẹ̀ẹ́dẹ́gbẹ̀rin (52,700).

³⁵Wọ̀nyí ni àwọn ọmọ Éfúráímù gẹ́gẹ́ bí ìdílé wọn: láti ọ̀dọ̀ Ṣútẹ́là, ìdílé àwọn ọmọ Ṣútẹ́là; ti Békérì, ìdílé àwọn ọmọ Békérì; ti Táhánì, ìdílé àwọn ọmọ Táhánì.

³⁶Wọ̀nyí ni àwọn ọmọ Ṣútélà: ti Éránì, ìdílé àwọn ọmo Éránì;

³⁷Wọ̀nyí ni ìdílé àwọn ọmọ Éfurémù, àwọn tí a kà nínú wọn sì jẹ́ ẹgbàámẹ́rìndínlógún ó lé ẹ̀ẹ́dẹ́gbẹ̀ta (32,500). Wọ̀nyí ni àwọn ọmọ Jóṣẹ́fù gẹ́gẹ́ bí ìdílé wọn.

³⁸Àwọn ọmọ Bẹ́ńjámínì gẹ́gẹ́ bí ìdílé wọn nì yí: tí Bẹ́là, ìdílé àwọn ọmọ Bẹ́là; ti Ásíbérì, ìdílé àwọn ọmọ Ásíbérì; ti Áhírámù, ìdílé àwọn ọmọ Áhírámù;

³⁹ti Ṣúfámù, ìdílé àwọn ọmọ Ṣúfámù; ti Húfámù, ìdílé àwọn ọmọ Húfámù.

⁴⁰Àwọn ọmọ Bẹ́là ní pasẹ̀ Árídì àti Náámánì nì yí: ti Árádì, ìdílé àwọn ọmọ Árádì; ti Náámánì, ìdílé àwọn ọmọ Náámánì.

⁴¹Wọ̀nyí ni àwọn ọmọ Bẹ́ńjámínì; gẹ́gẹ́ bí ìdílé wọn; àti àwọn tí a kà nínú wọn jẹ́ ẹgbàáméjìlélógún ó lé ẹgbẹ̀jọ (45,600).

⁴²Wọ̀nyí ni àwọn ọmọ Dánì gẹ́gẹ́ bí ìdílé wọn: ti Ṣúhámù, ìdílé àwọn ọmọ Ṣúhámù Wọ̀nyí ni ìdílé Dánì gẹ́gẹ́ bí ìdílé wọn:

⁴³Gbogbo ìdílé àwọn ọmọ Ṣúhámù, gẹ́gẹ́ bí àwọn tí a kà nínú wọn jẹ́ ẹgbàáméjìlélọ́gbọ̀n ó lé irínwó (64,400).

⁴⁴Ti àwọn ọmọ Ásérì gẹ́gẹ́ bí ìdílé wọn: ti Ímínà, ìdílé àwọn ọmọ Ímínà; ti Íṣífì, ìdílé àwọn ọmọ Íṣífì; ti Béríà, ìdílé àwọn ọmọ Béríà;

⁴⁵Ti àwọn ọmọ Béríà: ti Hébérì, ìdílé àwọn ọmọ Hébérì; ti Mákíẹ́lì, ìdílé àwọn ọmọ Mákíẹ́lì.

⁴⁶(Orúkọ ọmọ Áṣérì obìnrin nì jẹ́ Ṣérà.)

⁴⁷Wọ̀nyí ni ìdílé àwọn ọmọ Áṣérì gẹ́gẹ́ bí àwọn tí a kà nínú wọn jẹ́ ẹgbàá mẹ́rìndínlọ́gbọ̀n ó lé egbéje (53,400).

⁴⁸Ti àwọn ọmọ Náfítalì gẹ́gẹ́ bí ìdílé wọn: ti Jásélì, ìdílé àwọn ọmọ Jásélì: ti Gúnì, ìdílé àwọn ọmọ Gúnì;

⁴⁹ti Jésérì, ìdílé àwọn ọmọ Jéṣérì; ti Ṣílémù, ìdílé àwọn ọmọ Ṣilemù.

⁵⁰Wọ̀nyí ni ìdílé ti Náfítalì gẹ́gẹ́ bí ìdílé wọn, àwọn tí a kà nínú wọn jẹ́ ẹgbàá méjìlélógún ó lé egbéje (45,400).

⁵¹Àpapọ̀ iye tí a kà nínú àwọn ọmọ Ísírẹ́lì jẹ́ ọgbọ̀n ọ̀kẹ́, ó lé ẹgbẹ̀sán ó dín àádọ́rin (601,730).

⁵²OLÚWA sọ fún Mósè pé,

⁵³“Ilẹ̀ náà gbọdọ̀ jẹ́ pínpín fún wọn gẹ́gẹ́ bí ogún wọn gẹ́gẹ́ bí iye orúkọ wọn

⁵⁴Fún àwọn ọ̀pọ̀ ni kí ìwọ ó fún ní ogún ìlú púpọ̀ àti fún àwọn tí ó kéré ni kí ìwọ ó fi kékeré fún, ẹnìkọ̀ọ̀kan gbọdọ̀ gba ogún ìbí tirẹ̀ gẹ́gẹ́ bí ènìyàn tí a kọ.

⁵⁵Rí dájú pé ilẹ̀ yìí gbọdọ̀ jẹ́ fífi ìbò pín gẹ́gẹ́ bí wọn sì ti pọ̀ tó. Gẹ́gẹ́ bí orúkọ ẹ̀yà àwọn baba wọn ni kí wọn kí ó ni ín.

⁵⁶Olúkúlùkù ogún ìní ni a gbọdọ̀ fi ìbò pín gẹ́gẹ́ bí wọ́n ti pọ̀ tó láàrin ńlá àti kékeré.”

⁵⁷ Wọ̀nyí ni àwọn ọmọ Léfì tí a kà nínú wọn gẹ́gẹ́ bí ìdílé wọn: ti Gáṣónì, ìdílé àwọn ọmọ Gáṣónì; ti Kóhátì, ìdílé àwọn ọmọ Kóhátì; ti Mérárì, ìdílé àwọn ọmọ Mérárì.

⁵⁸Wọ̀nyí ni ìdílé àwọn ọmọ Léfì; ìdílé àwọn ọmọ Líbínì, ìdílé àwọn ọmọ Hébírónì, ìdílé àwọn ọmọ Málì, ìdílé àwọn ọmọ Múṣì, ìdílé àwọn ọmọ Kórà. (Kóhátì ni baba Ámírámù,

⁵⁹Orúkọ aya Ámírámù sì ń jẹ́ Jókébédì, ọmọbìnrin Léfì, tí ìyá rẹ̀ bí fún Léfì ní Éjíbítì. Òun sì bí Árónì, Mósè, àti Míríámù arábìnrin wọn fún Ámírámù.

⁶⁰Árónì ni baba Nádábù àti Ábíhù, Élíásárì àti Ítamárì.

⁶¹Ṣùgbọ́n Nádábù àti Ábíhù kú, nígbà tí wọ́n rú ẹbọ níwájú OLÚWA nígbà tí wọ́n mú iná àjèjì wá.)

⁶²Gbogbo àwọn ọmọkùnrin Léfì láti oṣù kan àti ju bẹ́ẹ̀ lọ ẹgbàá mọ́kànlá ó lé lẹ́gbẹ̀rún (23,000). Wọn kò ka wọ́n mọ́ àwọn ọmọ Ísírẹ́lì tókù nítorí tí wọ́n kò gba ogún ìní lára wọn.

⁶³Àwọn wọ̀nyí ni Mósè àti Élíásárì àlùfáà kà nígbà tí wọ́n ka àwọn ọmọ Ísírẹ́lì ní pẹ̀tẹ́lẹ̀ Móábù lẹ́bá odò Jọ́dánì létí Jẹ́ríkò.

⁶⁴ Kò sí ẹnìkan nínú àwọn tí Mósè àti Árónì àlùfáà kà nígbà tí wọ́n ka àwọn ọmọ Ísírẹ́lì ní ihà Sínáì.

⁶⁵Nítorí OLÚWA ti sọ fún àwọn ọmọ Ísírẹ́lì pé kíkú ni wọn yóò kú sí ihà, kò sì sí ẹnìkankan nínú wọn tí kò kú à fi Kálẹ́bù ọmọ Jéfúnì, àti Jóṣúà ọmọ Núnì.