Read Bíbélì Mímọ́ ní Èdè Yorùbá Òde-Òní Ìwé Nọ́ḿbà 34 Bible Online

Ìwé Nọ́ḿbà 34 - Bíbélì Mímọ́ ní Èdè Yorùbá Òde-Òní bible

Ìwé Nọ́ḿbà 34

¹OLÚWA sọ fún Mósè pé,

²“Pàṣẹ fún àwọn ọmọ Ísírẹ́lì, kí o sì sọ fún wọn pé: ‘Tí ẹ bá wọ Kénánì, ilẹ̀ tí a ó fi fún yín, gẹ́gẹ́ bí ogún yín yóò ní ààlà wọn yí:

³ “ ‘Ìhà gúṣù yín yóò bọ́ sí ara ihà Ṣínì lẹ́bá Édómù, àti ìlà-oòrùn, ààlà ìhà-gúsù yóò bẹ̀rẹ̀ láti òpin Òkun Iyọ̀,

⁴Kọjá lọ sí Síkọ́píọ́nì, tẹ̀ṣíwájú lọ si Sínì: kó bọ́ si gúsù Kadesi-Báníyà, kí o sì dé Hasari-Ádárò, kí o sì kọjá sí Ásímónì.

⁵Níbẹ̀ ni yóò ti padà, papọ̀ mọ́ odò Éjíbítì, tí yóò sì parí ní òpin Òkun.

⁶“ ‘Ìhà ìwọ̀ oòrùn yín yóò jẹ́ òpin lórí Òkun ńlá. Èyí yóò jẹ́ ààlà yín lórí ìhà-ìwọ̀ oòrùn:

⁷“ ‘Fún ààlà ìhà-àríwá, fa ìlà láti òkun ńlá lọ sí orí òkè Hórì

⁸Àti láti orí-òkè Hórì sí Lébò Hámátì. Nígbà náà ààlà náà yóò lọ sí Sédádì,

⁹Tẹ̀ṣíwájú lọ sí Sífírónì, kí o sì fò pín si ní Hasari-Énánì, Èyí yóò jẹ́ ààlà tìrẹ ní ìhà àríwá.

¹⁰“ ‘Kí ẹ sì sàmì sí ilẹ̀ ti yín ní ìhà ìlà oòrùn láti Hasari-Énánì lọ dé Ṣéfámù.

¹¹Ààlà náà yóò ti Séfámù sọ̀kalẹ̀ wá lọ sí Ríbílà ní ìhà-ìlà oòrùn Háínì, kí o sì sọ̀kalẹ̀ lọ dé ìhà Òkun Kínérétì ní ìhà ìlà oòrùn.

¹²Nígbà náà, ààlà náà yóò sọ̀kalẹ̀ lọ sí apá Jọ́dánì, yóò sì dópin nínú Òkun. “ ‘Èyí yóò jẹ́ ilẹ̀ yín, pẹ̀lú ààlà tirẹ̀ ní gbogbo ọ̀nà.’ ”

¹³ Mósè pa á láṣẹ fún àwọn ọmọ Ísírẹ́lì pé: “Yan ilẹ̀ yìí pẹ̀lú kèké gẹ́gẹ́ bí ìní ogún: OLÚWA ti paláṣẹ láti fi fún ẹ̀yà mẹ́san, àti ààbọ̀.

¹⁴Nítorí ará ilẹ ẹ̀yà ti Rúbẹ́nì, ẹ̀yà ti Gádì àti ẹ̀yà ààbọ̀ ti Mánásè ti gba ogún ti wọn.

¹⁵Ẹ̀yà méjèèjì àti ààbọ̀ yìí ti gba ogún ti wọn ní ìhà Jódánì létí i Jéríkò, Gábásì, ní ìhà ìlà oòrùn.”

¹⁶OLÚWA sọ fún Mósè pé,

¹⁷“Èyí ni orúkọ àwọn ọkùnrin náà tí yóò pín ilẹ̀, náà fún yín gẹ́gẹ́ bí ogún: Élíásárì àlùfáà àti Jóṣúà ọmọ Núnì.

¹⁸Kí o sì yan olórí kan nínú ẹ̀yà kọ̀ọ̀kan láti pín ilẹ̀ náà.

¹⁹Èyí ni orúkọ wọn: Kálẹ́bù ọmọ Jéfúnè, láti ẹ̀yà Júdà;

²⁰Ṣémúélì ọmọ Ámíhúdì, láti ẹ̀yà Ṣíméónì;

²¹Élídádì ọmọ Kísílónì, láti ẹ̀yà Bẹ́ńjámínì;

²²Búkì ọmọ Jógílì, láti ẹ̀yà olórí àwọn ọmọ Dánì;

²³Háníélì ọmọ Éfódù, láti ẹ̀yà Mánásè, olórí àwọn ọmọ Jóṣẹ́fù,

²⁴Kémúélì ọmọ Ṣífílánì, olórí ẹ̀yà àwọn ọmọ, Éfúráímù, ọmọ Jóṣẹ́fù;

²⁵Élísáfánì ọmọ Pánákì, olórí ẹ̀yà àwọn ọmọ Ṣébúlunì;

²⁶Pátíélì ọmọ Ásánì, olórí ẹ̀yà àwọn ọmọ Ísákárì;

²⁷Áhíhúdù ọmọ Ṣélómì, olórí ẹ̀yà àwọn ọmọ Áṣérì;

²⁸Pédàhẹ́lì ọmọ Ámíhúdì, olórí ẹ̀yà àwọn ọmọ Náfitalì.”

²⁹Èyí ni àwọn ẹni tí OLÚWA yàn láti pín ogún náà fún àwọn ọmọ Ísírẹ́lì ní ilẹ̀ Kénánì.