Read Bíbélì Mímọ́ ní Èdè Yorùbá Òde-Òní Ìwé Wòlíì Míkà 1 Bible Online

Ìwé Wòlíì Míkà 1 - Bíbélì Mímọ́ ní Èdè Yorùbá Òde-Òní bible

Ìwé Wòlíì Míkà 1

¹Ọ̀rọ̀ OLÚWA tí ó tọ Míkà ará Mórésétì wá ní àkókò ìjọba Játamù, Áhásì, àti Heṣekáyà, àwọn ọba Júdà nìwọ̀nyí, ìran tí ó rí nípa Samaríà àti Jérúsálẹ́mù.

²Ẹ gbọ́, gbogbo ẹ̀yin ènìyàn, fétísílẹ̀, ìwọ ayé àti gbogbo ohun tó wà níbẹ̀, kí OLÚWA alààyè lè ṣe ẹlẹ́rìí sí yín, OLÚWA láti inú tẹ́ḿpìlì mímọ́ rẹ̀ wá.

³Wò ó! OLÚWA ń bọ̀ wá láti ibùgbé rẹ̀; yóò sọ̀kalẹ̀, yóò sì tẹ ibi gíga ayé mọ́lẹ̀.

⁴Àwọn òkè ńlá yóò sí yọ́ lábẹ́ rẹ̀, àwọn àfonífojì yóò sì pín yà, bí idà níwájú iná, bí omi tí ó ń ṣàn lọ ni ibi gẹ̀rẹ́gẹ̀rẹ́.

⁵Nítorí ìré-òfin-kọjá Jákọ́bù ni gbogbo èyí, àti nítorí ẹ̀ṣẹ̀ ilé Ísírẹ́lì. Kí ni ìré-òfin-kọjá Jákọ́bù? Ǹjẹ́ Samaríà ha kọ? Kí ni àwọn ibi gíga Júdà? Ǹjẹ́ Jérúsálẹ́mù ha kọ?

⁶“Nítorí náà, èmi yóò ṣe Samaríà bí òkítì lórí pápá, bí ibi ti à ń lò fún gbíngbin àjàrà. Èmi yóò gbá àwọn òkúta rẹ̀ dànù sínú àfonífojì. Èmi yóò sí tú ìpilẹ̀sẹ̀ rẹ̀ palẹ̀.

⁷Gbogbo àwọn ère fífín rẹ̀ ni a ó fọ́ sí wẹ́wẹ́ gbogbo àwọn ẹ̀bùn tẹ́ḿpìlì rẹ̀ ni a ó fi iná sun: Èmi yóò sí pa gbogbo àwọn òrìṣà rẹ̀ run. Nítorí tí ó ti kó àwọn ẹ̀bùn rẹ̀ jọ láti inú owó èrè panṣágà, gẹ́gẹ́ bí owó èrè panṣágà, wọn yóò sì tún padà sí owó iṣẹ́ panṣágà.”

⁸Nítorí èyí, èmi yóò sì sunkún, èmi yóò sì pohùnréré ẹkún: èmi yóò máa lọ ní ẹsẹ̀ lásán àti ní ihòòhò Èmi yóò ké bí akátá, èmi yóò sì máa dárò bí àwọn ọmọ ògòǹgò.

⁹Nítorí tí ọgbẹ́ rẹ̀ jẹ́ aláìlewòtán; ó sì ti wá sí Júdà. Ó sì ti dé ẹnu bodè àwọn ènìyàn mi, àní sí Jérúsálẹ́mù.

¹⁰Ẹ má ṣe sọ ní Gátì ẹ má ṣe sunkún rárá. Ní ilẹ̀ Bẹti-ófírà mo yí ara mi nínú eruku.

¹¹Ẹ kọjá lọ ni ìhòòhò àti ni ìtìjú, ìwọ tí ó ń gbé ni Sáfírì. Àwọn tí ó ń gbé ni Sáánánì kì yóò sì jáde wá. Bétésélì wà nínú ọ̀fọ̀; A ó sì gba ààbò rẹ̀ kúrò lọ́wọ́ yin.

¹²Nítorí àwọn tí ó ń gbé ni Márátì ń retí ire, Ṣùgbọ́n ibi sọ̀kalẹ̀ ti ọ̀dọ̀ OLÚWA wá sí ẹnu bodè Jérúsálẹ́mù.

¹³Ìwọ olùgbé Lákísi, dì kẹ̀kẹ́ mọ́ ẹranko tí ó yára. Òun sì ni ìbẹ̀rẹ̀ ẹ̀ṣẹ̀ sí àwọn ọmọbìnrin Síónì, nítorí a rí ìré-òfin-kọjá Ísírẹ́lì nínú rẹ̀.

¹⁴Nítorí náà ni ìwọ ó ṣe fi ìwé ìkọ̀sílẹ̀ fún Mórésétígátì. Àwọn ilé Ákísíbì yóò jẹ́ ẹlẹ̀tàn sí àwọn ọba Ísírẹ́lì.

¹⁵Èmi yóò sì mú àrólé kan wá sórí rẹ ìwọ olùgbé Máréṣà. Ẹni tí ó jẹ́ ogo Ísírẹ́lì yóò sì wá sí Ádúlámù.

¹⁶Fá irun orí rẹ nínú ọ̀fọ̀ nítorí àwọn ọmọ rẹ aláìlágbára, sọ ra rẹ̀ di apárí bí ẹyẹ igún, nítorí wọn yóò kúrò lọ́dọ̀ rẹ lọ sí ìgbèkùn.