Read Bíbélì Mímọ́ ní Èdè Yorùbá Òde-Òní Ìwé Wòlíì Náhúmù 2 Bible Online

Ìwé Wòlíì Náhúmù 2 - Bíbélì Mímọ́ ní Èdè Yorùbá Òde-Òní bible

Ìwé Wòlíì Náhúmù 2

¹Àwọn apanirun ti dìde sí ọ, ìwọ Nínéfè pa ilé-ìsọ́ mọ́, ṣọ́ ọ̀nà náà di àmùrè, ẹ̀gbẹ́ rẹ kí ó le, múra gírí.

²OLÚWA yóò mú ọláńlá Jákọ́bù padà sípò gẹ́gẹ́ bí ọláńlá Ísírẹ́lì bí ó tilẹ̀ jẹ́ pé àwọn apanirun ti pa ibẹ̀ run, tí wọ́n sì ti run àwọn àjàrà wọn.

³Asà àwọn ọmọ ogun rẹ̀ sì di pupa; àwọn ológun wọn sì wọ aṣọ òdòdó. Idẹ tí ó wà lórí kẹ̀kẹ́ ogun ń kọ mọ̀nàmọ̀nà ní ọjọ́ tí a bá pèsè wọn sílẹ̀ tán; igi fìrì ni a ó sì mì tìtì.

⁴Àwọn kẹ̀kẹ́ ogun yóò ya bo àwọn pópónà, wọn yóò sì máa sáré síwá àti sẹ́yìn ní àárin ìgboro. Wọn sì dàbí ètúfú iná; tí ó sì kọ bí i mọ̀nàmọ́ná.

⁵Òun yóò ṣe àṣàrò àwọn ọlọ́lá rẹ̀; ṣíbẹ̀ wọ́n ń kọsẹ̀ ní ojú ọ̀nà wọn; wọn sá lọ sí ibi odi rẹ̀, a ó sì pèsè ààbò rẹ̀.

⁶A ó sí ìlẹ̀kùn àwọn odò wọ̀n-ọn-nì sílẹ̀, a ó sì mú ààfin náà di yíyọ́.

⁷A pa á láṣẹ pé ìlú náà Èyí tí a ti fi ìdí rẹ̀ múlẹ̀ ni kí a kó ní ìgbèkùn lọ. A ó sì mú un gòkè wá àti awọn ìránṣẹ́bìnrin rẹ̀ yóò ti ohùn bí ti oriri, ṣe amọ̀nà rẹ̀, wọn a sì máa lu àyà wọn.

⁸Nínéfè dàbí adágún omi, tí omi wọn sì ń gbẹ́ ẹ lọ. “Dúró! Dúró!” ni wọ́n ó máa kígbe, ṣùgbọ́n ẹnikankan kì yóò wo ẹ̀yìn.

⁹“Ẹ kó ìkógun fàdákà! Ẹ kó ìkógun wúrà! Ìṣúra wọn ti kò lópin náà, àti ọrọ̀ kúrò nínú gbogbo ohun èlò ti a fẹ́!”

¹⁰Òun ti ṣòfò, ó si di asán, ó sì di ahoro: ọkàn pami, éekún ń lu ara wọn, ìrora púpọ̀ sì wà nínú gbogbo ẹgbẹ́ àti ojú gbogbo wọ́n sì rẹ̀wẹ̀sì.

¹¹Níbo ni ihò àwọn kìnnìún wà àti ibi ìjẹun àwọn ọmọ kìnnìún, níbi tí kìnnìún, àní abo kìnnìún ti ń rìn, àti ọmọ kìnnìún, láìsí ohun ìbẹ̀rù

¹²Kìnnìún pàápàá tẹ́rù fún àwọn ọmọ rẹ̀, ó sì fún-un ní ọ́rùn pa fún àwọn abo kìnnìún rẹ̀, Ó sì fi ohun pípa kún ibùgbé rẹ̀ àti ihò rẹ̀ fún ohun ọdẹ.

¹³“Kíyèsíi èmi dojú kọ ọ́,” ni OLÚWA awọn ọmọ ogun wí. “Èmi yóò sì fi kẹ̀kẹ́ rẹ̀ wọ̀n-ọn-nì jóná nínú èéfín, idà yóò sì jẹ ọmọ kìnnìún rẹ̀ wọ̀n-ọn-nì run. Èmi yóò sì ké ohun ọdẹ rẹ kúrò lórí ilẹ̀ ayé Ohùn awọn òjíṣẹ́ rẹ ni a kì yóò sì tán gbọ́ mọ́.”