Read Bíbélì Mímọ́ ní Èdè Yorùbá Òde-Òní Ìwé Wòlíì Sekaráyà 10 Bible Online

Ìwé Wòlíì Sekaráyà 10 - Bíbélì Mímọ́ ní Èdè Yorùbá Òde-Òní bible

Ìwé Wòlíì Sekaráyà 10

¹Ẹ bèèrè òjò nígbà àrọ̀kúrò ni ọwọ́ OLÚWA; OLÚWA tí o dá mọ̀nàmọ́ná, tí ó sì fi ọ̀pọ̀ òjò fún ènìyàn, fún olúkúlúkù koríko ní pápá.

²Nítorí àwọn òrìṣà tí sọ̀rọ̀ asán, àwọn aláfọ̀ṣẹ sì tí rí èké, wọn sì tí rọ àlá èké; wọ́n ń tu ni nínú láṣán, nítorí náà àwọn ènìyàn náà ṣáko lọ bí àgùntàn, a ṣẹ wọn níṣẹ̀ẹ́, nítorí Olùṣọ́àgùntàn kò sí.

³“Ìbínú mi ru sí àwọn darandaran, èmi o sì jẹ àwọn olórí níyà nítorí OLÚWA àwọn ọmọ-ogun ti bẹ agbo rẹ̀, ilé Júdà wò, yóò ṣi fi wọn ṣe ẹṣin rẹ̀ dáradára ní ogun.

⁴Láti ọ̀dọ̀ rẹ̀ ni òkúta igun ilé ti jáde wá, láti ọ̀dọ̀ rẹ ni igi-èèkàn àgọ́ tí wá, láti ọ̀dọ̀ rẹ ni ọrún ogun tí wá, láti ọ̀dọ̀ rẹ ni àwọn akóniṣiṣẹ́ gbogbo tí wá.

⁵Gbogbo wọn yóò sì dàbí ọkùnrin alágbára ni ogun tí ń tẹ àwọn ọ̀tá wọn mọ́lẹ̀ ní ìgboro, wọn ó sì jagun, nítorí OLÚWA wà pẹ̀lú wọn, wọn ó sì dààmú àwọn tí ń gun ẹṣin.”

⁶“Èmi o sì mú ilé Júdà ní agbára, èmi o sì gba ilé Jósẹ́fù là, èmi ó sì tún mú wọn padà nítorí mo tí ṣàánú fún wọn, ó sì dàbí ẹni pé èmi kò ì tìí ta wọ́n nù; nítorí èmi ni OLÚWA Ọlọ́run wọn, èmi o sì gbọ́ ti wọn

⁷Éfúráímù yóò sì ṣe bí alágbára, ọkàn wọn yóò sì yọ̀ bi ẹni pé nípa ọtí-wáìnì: àní àwọn ọmọ wọn yóò rí í, wọn o sì yọ̀, inú wọn ó sì dùn nínú OLÚWA.

⁸Èmi ó kọ sí wọn, èmi ó sì ṣà wọ́n jọ; nítorí èmi tí rà wọ́n padà; wọn ó sì pọ̀ sí i gẹ́gẹ́ bí wọ́n tí ń pọ̀ sí í rí.

⁹Bí ó tilẹ̀ jẹ́ pé mo tú wọn kákiri orílẹ̀-èdè: ṣíbẹ̀ wọn ó sì rántí mi ni ilẹ̀ jínjìn; wọn ó sì gbé pẹ̀lú àwọn ọmọ wọn, wọn ó sì tún padà.

¹⁰Èmi ó sì tún mú wọn padà kúrò ni ilẹ̀ Éjíbítì pẹ̀lú, èmi ó sì ṣà wọn jọ kúrò ni ilẹ̀ Áṣíríà: èmi ó sì mú wọn wá sí ilẹ̀ Gílíádì àti Lébánónì; a a kì yóò sì rí àyè fún wọn bí ó ti yẹ.

¹¹Wọn yóò sì la òkun wàhálà já, yóò sì lu rírú omi nínú òkun, gbogbo ibú odò ni yóò sì gbẹ, a ó sì rẹ ìgbéraga Áṣíríà ṣílẹ̀, ọ̀pá aládé Éjíbítì yóò sí lọ kúrò.

¹²Èmi ó sì mú wọn ní agbára nínú OLÚWA; wọn ó sì rìn sókè rìn sódò ni orúkọ rẹ̀,” ni OLÚWA wí.