Read Bíbélì Mímọ́ ní Èdè Yorùbá Òde-Òní Ìwé Ìyìnrere Mátíù 1 Bible Online

Ìwé Ìyìnrere Mátíù 1 - Bíbélì Mímọ́ ní Èdè Yorùbá Òde-Òní bible

Ìwé Ìyìnrere Mátíù 1

¹Ìran Jésù Kírísítì, ẹni tí í ṣe ọmọ Dáfídì, ọmọ Ábúráhámù:

²Ábúráhámù ni baba Ísáákì; Ísáákì ni baba Jákọ́bù; Jákọ́bù ni baba Júdà àti àwọn arákùnrin rẹ̀,

³Júdà ni baba Pérésì àti Ṣérà, Támárì sì ni ìyá rẹ̀, Pérésì ni baba Ésírónù: Ésírónù ni baba Rámù;

⁴Rámù ni baba Ámínádábù; Ámínádábù ni baba Náhísónì; Náhísónì ni baba Sálímónì;

⁵Sálímónì ni baba Bóásì, Ráhábù sí ni ìyá rẹ̀; Bóásì ni baba Óbédì, Rúùtù sí ni ìyá rẹ̀; Óbédì sì ni baba Jésè;

⁶Jésè ni baba Dáfídì ọba. Dáfídì ni baba Sólómónì, ẹni tí ìyá rẹ̀ jẹ́ aya Húráyà tẹ́lẹ̀ rí.

⁷Sólómónì ni baba Réhóbóámù, Réhóbóámù ni baba Ábíjà, Ábíjà ni baba Ásà,

⁸Áṣà ni baba Jéhósáfátì; Jéhósafátì ni baba Jéhórámù; Jéhórámù ni baba Húsáyà;

⁹Húsáyà ni baba Jótámù; Jótámù ni baba Áhásì; Áhásì ni baba Heṣekáyà;

¹⁰Heṣekáyà ni baba Mánásè; Mánásè ni baba Ámónì; Ámónì ni baba Jósáyà;

¹¹ Jósáyà sì ni baba Jékónáyà àti àwọn arákùnrin rẹ̀ ní àkókò ìkólọ sí Bábílónì.

¹²Lẹ́yìn ìkólọ sí Bábílónì: Jékónáyà ni baba Selítílì; Selítílì ni baba Sérúbábélì;

¹³Sèrérúbábélì ni baba Ábíúdì; Ábíúdì ni baba Élíákímù; Élíákímù ni baba Ásórì;

¹⁴Ásórì ni baba Sádókù; Sádókù ni baba Ákímù; Ákímù ni baba Élíúdì;

¹⁵Élíúdì ni baba Élíásárì; Élíásárì ni baba Mátítánì; Mátítánì ni baba Jákọ́bù;

¹⁶Jákọ́bù ni baba Jósẹ́fù, ẹni tí ń ṣe ọkọ Màríà, ìyá Jésù, ẹni tí í ṣe Kírísítì.

¹⁷Bẹ́ẹ̀ ni gbogbo wọ́n jẹ́ ìran mẹ́rìnlá láti orí Ábúráhámù dé orí Dáfídì, ìran mẹ́rìnlà á láti orí Dáfídì títí dé ìkólọ sí Bábílónì, àti ìran mẹ́rìnlà láti ìkólọ títí dé orí Kírísítì.

¹⁸ Bí a ṣe bí Jésù nì yìí: Ní àkókò ti àdéhùn ìgbéyàwó ti parí láàrin Màríà ìyá rẹ̀ àti Jósẹ́fù, ṣùgbọ́n kí wọn tó pàdé, a rí i ó lóyún láti ọwọ́ Ẹ̀mí Mímọ́.

¹⁹Nítorí Jósẹ́fù ọkọ rẹ̀ tí í ṣe olóòótọ́ ènìyàn kò fẹ́ dójú tì í ní gbangba, ó ní èrò láti kọ̀ ọ́ sílẹ̀ ní ìkọ̀kọ̀.

²⁰Ṣùgbọ́n nígbà tí ó ro èrò yìí tán, ańgẹ́lì Olúwa yọ sí i ní oju àlá, ó wí pé, “Jósẹ́fù, ọmọ Dáfídì, má fòyà láti fi Màríà ṣe aya rẹ, nítorí oyún tí ó wà nínú rẹ̀ láti ọwọ́ Ẹ̀mí Mímọ́ ni.

²¹ Òun yóò sì bí ọmọkùnrin, ìwọ yóò sì pe orúkọ rẹ̀ ní Jésù, nítorí òun ni yóò gba àwọn ènìyàn rẹ̀ là kúrò nínú ẹ̀ṣẹ̀ wọn.”

²²Gbogbo nǹkan wọ̀nyí sì ṣẹ láti mú ọ̀rọ̀ Olúwa ṣẹ èyí tí a sọ láti ẹnu wòlíì rẹ̀ wá pé:

²³ “Wúndíá kan yóò lóyún, yóò sì bí ọmọkùnrin kan, a ó sì pe orúkọ rẹ̀ ní ‘Èmánúẹ́lì,’ ” èyí tí ó túmọ̀ sí, “Ọlọ́run wà pẹ̀lú wa.”

²⁴Nígbà tí Jósẹ́fù jí lójú oorun rẹ̀, òun ṣe gẹ́gẹ́ bí ańgẹ́lì Olúwa ti pàṣẹ fún un. Ó mú Màríà wá sílé rẹ̀ ní aya.

²⁵Ṣùgbọ́n òun kò mọ̀ ọ́n títítí ó fi bí ọmọkùnrin, òun sì sọ orúkọ rẹ̀ ní Jésù.