Read Bíbélì Mímọ́ ní Èdè Yorùbá Òde-Òní Ìwé Àwọn Ará Fílípì 4 Bible Online

Ìwé Àwọn Ará Fílípì 4 - Bíbélì Mímọ́ ní Èdè Yorùbá Òde-Òní bible

Ìwé Àwọn Ará Fílípì 4

¹Nítorí náà ẹ̀yin ará mi olùfẹ́, ti mo sì ń ṣàfẹ́rí gidigidi, ayọ̀ àti adé mi, ẹ dúró ṣinṣin bẹ́ẹ̀ nínú Olúwa, ẹ̀yin olùfẹ́ mi.

²Èmi ń bẹ̀ Éúódíà, mo sì ń bẹ Síńtíkè, kí wọn ní inú kan náà nínú Olúwa.

³ Mo sì bẹ̀ ọ́ pẹ̀lú bí alájọrù àjàgà mi tòótọ́, ran àwọn obìnrin wọ̀nyí lọ́wọ́, nítorí wọn bá mi ṣiṣẹ́ pọ̀ ní ìfẹ̀gbẹ́-kẹ̀gbẹ́ nínú ìyìn rere, àti Kílẹ́mẹ́ńtì pẹ̀lú, àti àwọn olùbá-ṣiṣẹ́ mi yòókù pẹ̀lú, orúkọ àwọn tí ń bẹ nínú ìwé ìyè.

⁴Ẹ máa yọ̀ nínú Olúwa nígbà gbogbo: mo sì tún wí pé. Ẹ máa yọ̀.

⁵Ẹ jẹ́ ki ìpamọ́ra yín di mímọ́ fún gbogbo ènìyàn, Olúwa ń bẹ nítòòsí.

⁶ Ẹ má ṣe ṣe àníyàn ohunkóhun; ṣùgbọ́n nínú ohun gbogbo, nípa àdúrà àti ẹ̀bẹ̀ pẹ̀lú ìdúpẹ́, ẹ máa fi ìbéèrè yín hàn fún Ọlọ́run.

⁷Àti àlàáfíà Ọlọ́run, tí ó ju ìmòye gbogbo lọ, yóò pa ọkàn àti èrò yín máa nínú Kírísítì Jésù.

⁸Ní àkótán, ará, ohunkóhun tí í ṣe òótọ́, ohunkóhun tí í ṣe ọ̀wọ̀, ohunkóhun tí í ṣe títọ́ ohunkóhun tí í ṣe mímọ́, ohunkóhun tí í ṣe fífẹ́, ohunkóhun tí ó ni ìròyìn rere, bí ìwà títọ́ kan bá wà, bí ìyìn kan bá sì wà, ẹ máa gba nǹkan wọ̀nyí rò.

⁹ Àwọn nǹkan tí ẹ̀yin ti kọ́, tí ẹ̀yin sì ti gbà, tí ẹ̀yin sì ti gbọ́, tí ẹ̀yin sì ti rí lọ́wọ́ mi, ẹ máa ṣe wọ́n: Ọlọ́run àlàáfíà yóò sì wà pẹ̀lú yín.

¹⁰ Èmi yọ̀ gidigidi nínú Olúwa pé, níṣinṣinyìí, ẹ̀yin tún ti sọjí nínú àníyàn ọkàn yín sí mi, nítòótọ́ ọkàn yín ń fà mọ́ mi ṣùgbọ́n ẹ kò ní àǹfààní tó.

¹¹Kì í ṣe pé èmi ń sọ nítorí àìní: nítorí pé ipòkípò tí mo bá wà, mo tí kọ́ láti ní ìtẹ́lọ́rùn nínú rẹ̀.

¹²Mo mọ̀ bí a ti ṣe ń rẹ ara sílẹ̀, mo sì mọ̀ bí a ti ń di púpọ̀: ni ohunkóhun àti ní ohun gbogbo mo ti kọ́ àṣírí láti máa jẹ́ àjẹyó àti láti wà ni àìjẹ, láti máa ni ànító àti láti ṣe aláìní.

¹³ Èmi le ṣe ohun gbogbo nínú Kírísítì ẹni ti ń fi agbára fún mi

¹⁴Ṣùgbọ́n ẹ̀yin ṣeun gidigidi ní ti pé ẹ̀yin ṣe alábàápín nínú ìpọ́njú mi.

¹⁵Ẹ̀yin pàápàá sì mọ̀ pẹ̀lú, ẹ̀yin ará Fílípì, pé ni ìbẹ̀rẹ̀ ìyìn rere, nígbà tí mo kúrò ni Makedóníà, kò sí Ìjọ kan ti ó bá mi ń ṣe alábàápín ní ti gbígbà àti fífúnni, bí kò ṣe ẹ̀yin nìkan ṣoṣo.

¹⁶ Nítorí ní Tẹsalóníkà ẹ̀yin fi nǹkan ránṣẹ́, lẹ́ẹ̀kan fún àìní mi.

¹⁷Kì í ṣe nítorí ti èmi ń fẹ́ ẹ̀bùn náà: ṣùgbọ́n èmi ń fẹ́ èso ti yóò máa di púpọ̀ nítorí yín

¹⁸Ṣùgbọ́n mo ní ohun gbogbo, mo sì ti di púpọ̀: mo sì kún nígbà ti mo tí gba nǹkan wọ̀nyí lọ́wọ́ Ẹ́páfíródítù tí a ti rán wá lọ́dọ̀ yín, ọrẹ olóòórún dídùn, ẹbọ ìtẹ́wọ́gbà, tì í ṣe inú dídùn gidigidi sí Ọlọ́run.

¹⁹Ṣùgbọ́n Ọlọ́run mi yóò pèsè ní kíkún fún gbogbo àìní yín, gẹ́gẹ́ bí ọ̀rọ̀ rẹ̀ nínú ògo nínú Kírísítì Jésù.

²⁰Ṣùgbọ́n ògo ni fún Ọlọ́run àti Baba wa láé àti láéláé. Àmín.

²¹Ẹ kí olukùlùkù ènìyàn-mímọ́ nínú Kírísítì Jésù. Àwọn ará tí ó wà pẹ̀lú mi kí yín.

²²Gbogbo àwọn ènìyàn-mímọ́ kí yín, pàápàá àwọn tí ń ṣe ti agbo ilé Késárì.

²³ Oore-ọ̀fẹ́ Jésù Kírísítì Olúwa wa, kí ó wà pẹ̀lú ẹ̀mí yín. Àmín.