Read Bíbélì Mímọ́ ní Èdè Yorùbá Òde-Òní Ìwé Àwọn Ará Hébérù 1 Bible Online

Ìwé Àwọn Ará Hébérù 1 - Bíbélì Mímọ́ ní Èdè Yorùbá Òde-Òní bible

Ìwé Àwọn Ará Hébérù 1

¹Ní ìgbà àtijọ́, Ọlọ́run bá àwọn baba ńlá wa sọ̀rọ̀ láti ẹnu àwọn wòlíì ní ọ̀pọ̀ ìgbà àti ní onírúurú ọ̀nà,

²ṣùgbọ́n ní ìgbà ìkẹyìn yìí Ọlọ́run ń bá wa sọ̀rọ̀ nípasẹ̀ Ọmọ rẹ̀ Jésù Kírísítì, ẹni tí ó fi ṣe ajogún ohun gbogbo, nípasẹ̀ ẹni tí ó dá gbogbo ayé yìí àti ohun gbogbo tí ń bẹ nínú rẹ̀:

³Ọmọ tí í ṣe ìtànsán ògo Ọlọ́run àti àwòrán òun tìkálárarẹ̀, tí ó sì ń fi ọ̀rọ̀ agbára rẹ̀ mú ohun gbogbo dúró: Lẹ́yìn tí ó ti ṣe ìwẹ̀nù ẹ̀ṣẹ̀ wa tan, ó wá jókòó ní ọwọ́ ọ̀tún ọlá-ńlá ní òkè.

⁴Nítorí náà, ó sì ti fi bẹ́ẹ̀ di ẹni tí ó ga ní ipò ju ańgẹ́lì lọ, bí ó ti jogún orúkọ èyí tí ó tayọ̀ ti wọn.

⁵ Nítorí kò sí ọ̀kan nínú àwọn ańgẹ́lì tí Ọlọ́run fi ìgbà kan sọ fún pé: “Ìwọ ni ọmọ mi; lónì- ni mo bí ọ”? Àti pẹ̀lú pé; “Èmi yóò jẹ́ baba fún-un, Òun yóò sì jé ọmọ mi”?

⁶ Àti pẹ̀lú, nígbà tí Ọlọ́run rán àkọ́bí rẹ̀ wá si ayé wa yìí. Ó pàṣẹ pé, “Ẹ jẹ́ kí gbogbo àwọn ańgẹ́lì Ọlọ́run foríbalẹ̀ fún un.”

⁷ Àti nípa ti àwọn ańgẹ́lì, ó wí pé; “Ẹni tí ó dá àwọn ańgẹ́lì rẹ̀ ní ẹ̀mi, àwọn ìránṣẹ́ rẹ̀ ní ọwọ́ ìná.”

⁸ Ṣùgbọ́n ó sọ nípa tí Ọmọ rẹ̀ pé, “Ọlọ́run, ìjọba rẹ yóò wà láti ìran dé ìran, àti pé òdodo ni ọ̀pá tí ìwọ fi ń páṣẹ ìjọba rẹ.

⁹Ìwọ fẹ́ òdodo, bẹ́ẹ̀ ni ìwọ kórìíra iṣẹ́ búburú; nítorí èyí ni Ọlọ́run, àní Ọlọ́run rẹ ṣe fi òróró ayọ̀ yàn ọ tí ó gbé ọ ju àwọn ẹgbẹ́ rẹ lọ.”

¹⁰Ó tún sọ pé, “Ní àtètèkọ́ṣe, ìwọ Olúwa, ìwọ fi ìdí ayé sọlẹ̀, àwọn ọ̀run sì jẹ́ iṣẹ́ ọwọ́ ara rẹ.

¹¹Wọn yóò ṣègbé, ṣùgbọ́n ìwọ yóò wà síbẹ̀ gbogbo wọn ni yóò gbó di àkísà bí ẹ̀wù.

¹²Ní kíká ni ìwọ yóò ká wọn bí aṣọ, bí ìpàrọ̀ aṣọ ni a ó sì pàárọ̀ wọn. Ṣùgbọ́n ìwọ fúnrarẹ kì yóò yípadà àti pé ọdún rẹ kì yóò ní òpin.”

¹³ Èwo nínú àwọn ańgẹ́lì ní a gbọ́ pé Ọlọ́run fi ìgbà kan wí fún pé, “Jókòó ní ọwọ́ ọ̀tún mi títí èmi yóò fi sọ àwọn ọ̀ta rẹ di àpótí ìtìsẹ̀ rẹ”?

¹⁴Kì í ha á ṣe ẹ̀mí tí ń jísẹ́ ni àwọn ańgẹ́lì í ṣe bí; tí a rán lọ síta láti máa sisẹ́ fún àwọn tí yóò jogún ìgbàlà?