Read Swahilli Yobu 20 Bible Online

Yobu 20 - Swahilli bible

Yobu 20

¹Kisha Sofari, Mnaamathi, akajibu:

²“Fikira zangu zanifanya nikujibu, wala siwezi kujizuia tena.

³Nasikia maonyo nisiyoweza kuvumilia, lakini akili yangu yanisukuma nijibu.

⁴“Wewe labda umesahau jambo hili: Kwamba tangu zamani Mungu alipomuumba mtu duniani,

⁵mwovu atajiona ameshinda kwa muda tu, furaha yake asiyemcha Mungu ni ya muda mfupi tu!

⁶Mwovu aweza kufana hata kufikia mbingu, kichwa chake kikafika kwenye mawingu,

⁷lakini atatupiliwa mbali kama mavi yake. Waliopata kumjua watajiuliza: ‘Yuko wapi?’

⁸Atatoweka kama ndoto, asionekane tena, atafutika kama maono ya usiku.

⁹Aliyemwona, hatamwona tena, wala pale alipoishi hapatatambuliwa tena.

¹⁰Yeye mwenyewe itambidi kurudisha mali yake yote, watoto wake wataomba huruma kwa maskini.

¹¹Japo alijisikia amejaa nguvu za ujana, lakini zote zitalala pamoja naye mavumbini.

¹²“Mdomoni mwake uovu ni mtamu kama sukari, anauficha chini ya ulimi wake;

¹³hataki kabisa kuuachilia, bali anaushikilia kinywani mwake.

¹⁴Lakini ufikapo tumboni huwa mchungu, mkali kama sumu ya nyoka.

¹⁵Mwovu humeza mali haramu na kuitapika; Mungu huitoa tumboni mwake.

¹⁶Anachonyonya mtu mwovu ni sumu ya nyoka; atauawa kwa kuumwa na nyoka.

¹⁷Hataishi kuiona mitiririko ya fanaka, wala vijito vya mafanikio na utajiri.

¹⁸Matunda ya jasho lake atayaachilia, hatakuwa na uwezo wa kuyaonja,

¹⁹kwa sababu amewaangamiza maskini na kuwaacha, amenyakua nyumba ambazo hakuzijenga.

²⁰“Kwa vile ulafi wake hauna mwisho, hataweza kuokoa chochote anachothamini.

²¹Baada ya kula hakuacha hata makombo, kwa hiyo fanaka yake yote haitadumu.

²²Kileleni mwa fanaka dhiki itamvamia, balaa itamkumba kwa nguvu zote.

²³Akiwa anajishughulisha kushibisha tumbo, Mungu atamletea ghadhabu yake imtiririkie kama chakula chake.

²⁴Labda ataweza kuepa upanga wa chuma, kumbe atachomwa na upanga wa shaba.

²⁵Mshale utachomolewa kutoka mwilini mwake; ncha yake itatolewa mgongoni mwake ikingaa, vitisho vya kifo vitamvamia.

²⁶Hazina zake zitaharibiwa, moto wa ajabu utamteketeza; kilichobaki nyumbani mwake kitateketezwa.

²⁷Mbingu zitaufichua uovu wake, dunia itajitokeza kumshutumu.

²⁸Mali zake zitanyakuliwa katika siku ya ghadhabu ya Mungu.

²⁹Hicho ndicho apewacho mtu mwovu kutoka kwa Mungu, ndicho mwovu alichopangiwa na Mungu.”