Read Swahilli Yobu 3 Bible Online

Yobu 3 - Swahilli bible

Yobu 3

¹Hatimaye Yobu aliamua kuongea, akailaani siku aliyozaliwa.

²Yobu akasema:

³“Ilaaniwe siku ile niliyozaliwa; usiku ule iliposemwa, ‘Mwana amechukuliwa mimba’

⁴Siku hiyo na iwe giza! Mungu juu asijishughulishe nayo! Wala nuru yoyote isiiangaze!

⁵Mauzauza na giza nene yaikumbe, mawingu mazito yaifunike. Giza la mchana liitishe!

⁶Usiku huo giza nene liukumbe! Usihesabiwe katika siku za mwaka, wala usitiwe katika idadi ya siku za mwezi.

⁷Naam, usiku huo uwe tasa, sauti ya furaha isiingie humo.

⁸Walozi wa siku waulaani, watu stadi wa kuligutua dude Lewiyathani waulaani!

⁹Nyota zake za pambazuko zififie, utamani kupata mwanga, lakini usipate, wala usione nuru ya pambazuko.

¹⁰Maana usiku huo haukulifunga tumbo la mama, wala kuficha taabu nisizione.

¹¹Mbona sikufa nilipozaliwa, nikatoka tumboni na kutoweka?

¹²Kwa nini mama yangu alinizaa? Kwa nini nikapata kunyonya?

¹³Maana ningekuwa nimezikwa, kimya; ningekuwa nimelazwa na kupumzika,

¹⁴pamoja na wafalme na watawala wa dunia, waliojijengea upya magofu yao;

¹⁵ningekuwa pamoja na wakuu waliokuwa na dhahabu, waliojaza nyumba zao fedha tele.

¹⁶Au, mbona sikuwa kama mimba iliyoharibika, naam, kama mtoto aliyezaliwa mfu?

¹⁷Huko kwa wafu waovu hawamsumbui mtu, huko wachovu hupumzika.

¹⁸Huko wafungwa hustarehe pamoja, hawaisikii kamwe sauti ya mnyapara.

¹⁹Wakubwa na wadogo wako huko, nao watumwa wamepata uhuru mbali na bwana zao.

²⁰Ya nini kumjalia nuru yule aliye taabuni; na uhai yule aliye na huzuni moyoni?

²¹Mtu atamaniye kifo lakini hafi; hutafuta kifo kuliko hazina iliyofichika.

²²Mtu kama huyo atashangilia mno na kufurahi, atafurahi atakapokufa na kuzikwa!

²³Ya nini kumjalia uhai mtu ambaye njia zake zimefungwa, mtu ambaye Mungu amemwekea kizuizi?

²⁴Kwa maana kusononeka ndio mkate wangu, kupiga kite kwangu kunatiririka mithili ya maji.

²⁵Kile ninachokiogopa kimenipata, ninachokihofia ndicho kilichonikumba.

²⁶Sina amani wala utulivu; sipumziki, taabu imenijia.”