Read Swahilli Yobu 31 Bible Online

Yobu 31 - Swahilli bible

Yobu 31

¹“Nimejifunga rasmi mimi mwenyewe, macho yangu yasimtazame msichana kwa tamaa.

²Au je, nangojea nini kutoka kwa Mungu aliye juu? Mungu Mwenye Nguvu ameniwekea kitu gani?

³Je, maafa hayawapati watu waovu na maangamizi wale watendao mabaya?

⁴Je, Mungu haoni njia zangu, na kujua hatua zangu zote?

⁵“Kama nimeishi kwa kufuata uongo, kama nimekuwa mbioni kudanganya watu,

⁶Mungu na anipime katika mizani ya haki, naye ataona kwamba sina hatia.

⁷Kama hatua zangu zimepotoka, moyo wangu ukafuata tamaa za macho yangu; kama mikono yangu imechafuliwa na dhambi,

⁸jasho langu na liliwe na mtu mwingine, mazao yangu shambani na yangolewe.

⁹“Kama moyo wangu umevutwa kwa mke wa mtu, kama nimenyemelea mlangoni kwa jirani yangu,

¹⁰basi, mke wangu na ampikie mume mwingine, na wanaume wengine wamtumie.

¹¹Jambo hilo ni kosa kuu la jinai, uovu ambao hakimu lazima atoe adhabu.

¹²Kosa langu lingekuwa kama moto, wa kuniteketeza na kuangamiza, na kuchoma kabisa mapato yangu yote.

¹³Kama nimekataa kesi ya mtumishi wangu wa kiume au wa kike, waliponiletea malalamiko yao,

¹⁴nitafanya nini basi Mungu atakaponikabili? Je, akinichunguza nitamjibu nini?

¹⁵Maana Mungu ndiye aliyeniumba mimi na mtumishi wangu; yeye ndiye aliyetuumba sisi wote.

¹⁶“Je, nimepata kumnyima maskini mahitaji yake au kuwafanya wajane watumaini bure?

¹⁷Je, nimekula chakula changu peke yangu, bila kuwaachia yatima nao wapate chochote?

¹⁸La! Tangu ujana wangu nimekuwa mlezi wao, tangu utoto wangu nimewaongoza wajane.

¹⁹Je, nilimwona mtu anakufa kwa kukosa nguo, au maskini ambaye hana nguo ya kuvaa,

²⁰bila kumpa joto kwa mavazi ya manyoya ya kondoo wangu naye akanitakia baraka za shukrani ya moyo?

²¹Kama nimenyosha mkono mahakamani dhidi ya yatima, nikijua nitapendelewa na mahakimu,

²²basi, bega langu na lingoke, mkono wangu na ukwanyuke kiwikoni mwake.

²³Maana maafa kutoka kwa Mungu ni kitisho kwangu; mimi siwezi kuukabili ukuu wake.

²⁴“Je, tumaini langu nimeliweka katika dhahabu, au, nimeiambia dhahabu safi, ‘Wewe ni usalama wangu?’

²⁵Je, nimepata kufurahia wingi wa utajiri wangu au kujivunia mapato ya mikono yangu?

²⁶Kama nimeliangalia jua likiangaza, na mwezi ukipita katika uzuri wake,

²⁷na moyo wangu ukashawishika kuviabudu, nami nikaibusu mikono yangu kwa heshima yake,

²⁸huo pia ungekuwa uovu wa kuadhibiwa na mahakimu maana ningekuwa mwongo mbele ya Mungu aliye juu.

²⁹“Je, nimefurahia kuangamia kwa adui yangu, au kufurahi alipopatwa na maafa?

³⁰La! Sikuruhusu kinywa changu kumtakia mabaya, kwa kumlaani ili afe.

³¹Watumishi wangu wote wanasema wazi kila mgeni amekaribishwa nyumbani mwangu.

³²Msafiri hakulala nje ya nyumba yangu, nilimfungulia mlango mpita njia.

³³Je nimeficha makosa yangu kama wengine? Je nimekataa kukiri dhambi zangu?

³⁴Sijaogopa kusimama mbele ya umati wa watu, wala kukaa kimya au kujifungia ndani, eti kwa kuogopa kutishwa na dharau zao.

³⁵Laiti angekuwapo mtu wa kunisikiliza! Naweza kutia sahihi yangu katika kila nilichosema. Namwambia Mungu Mwenye Nguvu anijibu! Laiti mashtaka wanayonitolea maadui zangu yangeandikwa!

³⁶Ningeyavaa kwa maringo mabegani na kujivisha kichwani kama taji.

³⁷Ningemhesabia Mungu kila kitu nilichofanya, ningemwendea kama mwana wa mfalme.

³⁸Kama nimeiiba ardhi ninayoilima, nikasababisha mifereji yake iomboleze,

³⁹kwa kufaidika na mazao yake bila kulipa na kusababisha kifo cha wenyewe,

⁴⁰basi miiba na iote humo badala ya ngano, na magugu badala ya shayiri.” Mwisho wa hoja za Yobu.