Read Swahilli Zaburi 66 Bible Online

Zaburi 66 - Swahilli bible

Zaburi 66

¹Enyi watu wote duniani mshangilieni Mungu!

²Imbeni juu ya utukufu wa jina lake, mtoleeni sifa tukufu!

³Mwambieni Mungu: “Matendo yako ni ya ajabu mno! Nguvu zako ni kubwa mno hata maadui zako wanajikunyata kwa hofu.

⁴Dunia yote inakuabudu; watu wote wanakuimbia sifa!”

⁵Njoni mkaone mambo aliyotenda Mungu; ametenda mambo ya kutisha kati ya watu:

⁶Aligeuza bahari kuwa nchi kavu, watu wakapita humo kwa miguu; hapo nasi tukashangilia kwa sababu yake.

⁷Anatawala milele kwa nguvu yake kuu; macho yake huchungulia mataifa yote. Mwasi yeyote asithubutu kumpinga.

⁸Msifuni Mungu wetu, enyi mataifa yote; tangazeni sifa zake zipate kusikika.

⁹Yeye ametujalia maisha, wala hakutuacha tuanguke.

¹⁰Umetupima, ee Mungu, umetujaribu kama madini motoni.

¹¹Umetuacha tunaswe wavuni; umetubebesha taabu nzito.

¹²Umewaacha watu watukanyage; tumepitia motoni na majini. Lakini sasa umetuleta kwenye usalama.

¹³Nitakuja nyumbani kwako na sadaka za kuteketezwa, nitakutimizia nadhiri zangu,

¹⁴nilizotamka na kukuahidi mimi mwenyewe nilipokuwa taabuni.

¹⁵Nitakutolea sadaka za kuteketezwa nononono, tambiko za kuteketezwa za kondoo madume; nitatoa sadaka za ng'ombe na mbuzi.

¹⁶Enyi mnaomcha Mungu, njoni nyote mkasikilize, nami nitawasimulieni aliyonitendea.

¹⁷Mimi nilimlilia msaada kwa sauti, sifa zake nikazitamka.

¹⁸Kama ningalinuia maovu moyoni, Mwenyezi-Mungu hangalinisikiliza.

¹⁹Lakini kweli Mungu amenisikiliza; naam, amesikiliza maneno ya sala yangu.

²⁰Asifiwe Mungu, maana hakuikataa sala yangu, wala kuondoa fadhili zake kwangu.