Read Swahilli Zaburi 72 Bible Online

Zaburi 72 - Swahilli bible

Zaburi 72

¹Ee Mungu, umjalie mfalme uamuzi wako, umpe mwanamfalme uadilifu wako;

²atawale taifa lako kwa haki, na maskini wako kwa uadilifu.

³Milima ilete fanaka kwa watu wako, vilima vijae uadilifu.

⁴Mfalme awatetee wanyonge wa taifa, awasaidie watoto wa fukara, na kuwaangamiza watu wadhalimu.

⁵Mfalme aishi muda mrefu kama jua, na kama mwezi, kwa vizazi vyote.

⁶Awe kama manyunyu yaburudishayo mashamba, kama mvua iinyweshayo ardhi.

⁷Uadilifu ustawi maisha yake yote, na amani kwa wingi mpaka mwezi ukome.

⁸Atawale kutoka bahari hata bahari, kutoka mto Eufrate hata mipaka ya dunia.

⁹Maadui zake wakaao nyikani wanyenyekee mbele yake, washindani wake walambe vumbi.

¹⁰Wafalme wa Tarshishi na visiwa wamlipe kodi, wafalme wa Sheba na Seba wamletee zawadi.

¹¹Wafalme wote wa dunia wamheshimu, watu wa mataifa yote wamtumikie.

¹²Anamkomboa fukara anayemwomba, na maskini asiye na wa kumsaidia.

¹³Anawahurumia watu dhaifu na fukara, anayaokoa maisha yao wenye shida.

¹⁴Anawatoa katika udhalimu na ukatili, maana maisha yao ni ya thamani kubwa kwake.

¹⁵Mfalme na aishi maisha marefu; apokee zawadi ya dhahabu kutoka Sheba; watu wamwombee kwa Mungu daima, na kumtakia baraka mchana kutwa.

¹⁶Nchi na izae nafaka kwa wingi, vilima vijae mavuno kama ya Lebanoni, na watu mijini wastawi kama nyasi.

¹⁷Jina la mfalme litukuke daima; fahari yake idumu pindi liangazapo jua. Kwake mataifa yote yabarikiwe; watu wote wamwite mbarikiwa!

¹⁸Atukuzwe Mwenyezi-Mungu, Mungu wa Israeli, ambaye peke yake hufanya miujiza.

¹⁹Jina lake tukufu na litukuzwe milele; utukufu wake ujae ulimwenguni kote! Amina, Amina!

²⁰Mwisho wa sala za Daudi, mwana wa Yese.