Read Swahilli Methali 12 Bible Online

Methali 12 - Swahilli bible

Methali 12

¹Apendaye nidhamu hupenda maarifa, bali asiyependa kuonywa ni mjinga.

²Mtu mwema hufadhiliwa na Mwenyezi-Mungu, lakini mwenye nia mbaya hulaaniwa na Mungu.

³Mtu hawi imara kwa kutenda maovu, lakini hakuna kiwezacho kumngoa mtu mwadilifu.

⁴Mke mwema ni taji ya fahari kwa mumewe; amwaibishaye mumewe ni kama kidonda mifupani mwake.

⁵Mawazo ya mwadilifu ni ya haki; mashauri ya mwovu ni ya udanganyifu.

⁶Maneno ya waovu lengo lake ni kuua, lakini maneno ya waadilifu huwaokoa wanaotishwa.

⁷Waovu huangamizwa na kutoweka kabisa, lakini jamaa ya waadilifu hudumishwa.

⁸Mtu husifiwa kadiri ya hekima yake, lakini mtu wa fikira mbaya hudharauliwa.

⁹Afadhali mtu wa chini anayejitegemea, kuliko ajitakiaye makuu na kukosa chakula.

¹⁰Mtu mwadilifu huwajali wanyama wake, lakini huruma ya mwovu ni ukatili.

¹¹Mkulima mwenye bidii ana chakula tele, lakini afuataye mambo yasiyofaa hana akili.

¹²Waovu hutamani faida isiyo halali, lakini mtu mwadilifu husimama imara.

¹³Mtu mwovu hunaswa kwa uongo wake mwenyewe, lakini mwadilifu hutoka katika taabu.

¹⁴Mtu hufanikiwa kutokana na maneno yake kama apatavyo matokeo ya kazi za mikono yake.

¹⁵Mpumbavu huiona njia yake kuwa sawa, lakini mwenye hekima husikiliza shauri.

¹⁶Udhia wa mpumbavu hujulikana mara, lakini mwerevu huyapuuza matukano.

¹⁷Msema kweli hutoa ushahidi wa kweli, lakini shahidi wa uongo hutamka udanganyifu.

¹⁸Maneno ya ovyo hujeruhi kama upanga, lakini asemayo mwenye hekima huponesha kidonda.

¹⁹Ukweli hudumu milele, lakini uongo ni wa kitambo tu.

²⁰Wanaopanga maovu wamejaa udanganyifu moyoni, lakini wanaonuia mema hupata furaha.

²¹Waadilifu hawapatwi na jambo lolote baya, lakini waovu wamejaa dhiki.

²²Midomo isemayo uongo ni chukizo kwa Mwenyezi-Mungu, lakini watu waaminifu ni furaha yake.

²³Mwenye busara huficha maarifa yake, lakini wapumbavu hutangaza upumbavu wao.

²⁴Kuwa na bidii kutampa mtu cheo, lakini uvivu utamfanya mtumwa.

²⁵Wasiwasi moyoni humkosesha mtu raha, lakini neno jema humchangamsha.

²⁶Mtu mwadilifu huuepa uovu, lakini njia ya waovu huwapotosha wenyewe.

²⁷Mwindaji mvivu hatapata anachowinda, lakini mwenye bidii atafanikiwa.

²⁸Uadilifu ni njia ya uhai, lakini uovu huongoza katika mauti.