Read Swahilli Yobu 18 Bible Online

Yobu 18 - Swahilli bible

Yobu 18

¹Kisha Bildadi, Mshuhi, akajibu:

²“Utawinda maneno ya kusema hadi lini? Tafakari vizuri nasi tutasema.

³Kwa nini unatufanya kama ng'ombe? Mbona unatuona sisi kuwa wapumbavu?

⁴Wewe unajirarua mwenyewe kwa hasira zako. Kwani, dunia itaachwa tupu kwa ajili yako au miamba ihamishwe toka mahali pake?

⁵ “Naam, mwanga wa mtu mwovu utazimishwa; mwali wa moto wake hautangaa.

⁶Nyumbani kwake mwanga ni giza, taa inayomwangazia itazimwa.

⁷Hatua zake ndefu zitafupishwa; mipango yake itamwangusha chini.

⁸Nyayo zake mwenyewe zitamtia mtegoni; kila akitembea anakumbana na shimo.

⁹Mtego humkamata kisiginoni, tanzi humbana kabisa.

¹⁰Amefichiwa kitanzi ardhini; ametegewa mtego njiani mwake.

¹¹Hofu kuu humtisha kila upande, humfuata katika kila hatua yake.

¹²Alikuwa na nguvu, lakini sasa njaa imembana; maafa yako tayari kumwangusha.

¹³“Ugonjwa mbaya unakula ngozi yake, maradhi ya kifo[21] hula viungo vyake.

¹⁴Anangolewa katika nyumba aliyoitegemea, na kupelekwa kwa mfalme wa vitisho.

¹⁵Nyumba yake tupu, wengine wataishi humo; madini ya kiberiti yametawanywa katika makao yake.

¹⁶Yeye ni kama mti uliokauka mizizi, matawi yake juu yamenyauka.

¹⁷Nchini hakuna atakayemkumbuka; jina lake halitatamkwa tena barabarani.

¹⁸Ameondolewa mwangani akatupwa gizani; amefukuzwa mbali kutoka duniani.

¹⁹Hana watoto wala wajukuu; hakuna aliyesalia katika makao yake.

²⁰Watu wa magharibi wameshangazwa na yaliyompata, hofu imewakumba watu wa mashariki.

²¹Hayo ndio yanayowapata wasiomjali Mungu; hapo ndipo mahali pa wasiomjua Mungu.”