Read Swahilli Yobu 22 Bible Online

Yobu 22 - Swahilli bible

Yobu 22

¹Kisha Elifazi, Mtemani, akajibu Yobu:

²“Je, binadamu anafaa chochote kwa Mungu? Kwa kweli mwenye hekima anajifaidi mwenyewe tu.

³Je, unadhani wamfurahisha Mungu kwa kuwa mnyofu? Au anapata faida gani kama huna hatia?

⁴Unadhani anakurudi na kukuhukumu kwa sababu wewe unamheshimu?

⁵La! Uovu wako ni mkubwa mno! Ubaya wako hauna mwisho!

⁶Wewe umemnyanganya ndugu yako nguo ya rehani; umemchukulia nguo hiyo moja aliyokuwa nayo.

⁷Umewanyima maji wale waliokuwa wamechoka; umewanyima chakula wale walio na njaa.

⁸Umemruhusu mwenye cheo kuchukua ardhi yote; umemwacha anayependelewa aishi humo.

⁹Umewaacha wajane waende mikono mitupu; umewanyima yatima uwezo wao.

¹⁰Kwa hiyo mitego imekuzunguka pande zote, hofu ya ghafla imekuvamia.

¹¹Giza limekuangukia usione kitu; mafuriko ya maji yamekufunika.

¹²Twajua Mungu yuko huko juu mbinguni. Tazama nyota za juu kabisa zilivyo mbali!

¹³Lakini wewe wasema: ‘Mungu ajua nini? Je, aweza kupenya mawingu akatoa hukumu?

¹⁴Mawingu mazito yamemzunguka asipate kuona yeye hutembea nje ya anga la dunia!’

¹⁵“Je, umeamua kufuata njia za zamani ambazo watu waovu wamezifuata?

¹⁶Hao walifagiliwa kabla ya wakati wao, misingi yao ilikumbwa mbali na maji.

¹⁷Hao ndio waliomwambia Mungu, ‘Achana nasi!’ Na ‘Wewe Mungu Mwenye Nguvu waweza nini juu yetu?’

¹⁸Lakini Mungu ndiye aliyejaza nyumba zao fanaka, lakini walimweka mbali na mipango yao![24]

¹⁹Wanyofu huona na kufurahi, wasio na hatia huwacheka na kuwadharau,

²⁰Wanasema ama kweli maadui zetu wameangamizwa, na walichobakiza kimeteketezwa kwa moto.

²¹“Sasa, Yobu, kubaliana na Mungu uwe na amani, na hapo mema yatakujia.

²²Pokea mafundisho kutoka kwake; na yaweke maneno yake moyoni mwako.

²³Ukimrudia Mungu na kunyenyekea, ukiondoa uovu mbali na makao yako,

²⁴ukitupilia mbali mali yako, ukaitupa dhahabu ya Ofiri ukingoni mwa kijito,

²⁵Mungu Mwenye Nguvu akawa ndio dhahabu yako, na fedha yako ya thamani;

²⁶basi, ndipo utakapomfurahia Mungu mwenye nguvu na kutazama kwa matumaini;

²⁷utamwomba naye atakusikiliza, nawe utazitimiza nadhiri zako.

²⁸Chochote utakachoamua kitafanikiwa, na mwanga utaziangazia njia zako.

²⁹Maana, Mungu huwaporomosha wenye majivuno, lakini huwaokoa wanyenyekevu.

³⁰Yeye humwokoa mtu asiye na hatia; wewe utaokolewa kwa matendo yako mema.”