Read Swahilli Yobu 23 Bible Online

Yobu 23 - Swahilli bible

Yobu 23

¹Kisha Yobu akajibu:

²“Leo pia lalamiko langu ni chungu. Napata maumivu na kusononeka.

³Laiti ningejua mahali nitakapompata Mungu! Ningeweza kwenda hata karibu naye.

⁴Ningeleta kesi yangu mbele yake, na kumtolea hoja yangu.

⁵Ningeweza kujua atakachonijibu, na kuelewa atakachoniambia.

⁶Je, angeshindana nami kwa nguvu zake zote? La! Bila shaka angenisikiliza.

⁷Yeye aweza kuzungumza na mtu mnyofu, Mungu, hakimu wangu angeamua kuwa sina hatia milele.

⁸“Tazama, nakwenda mbele, lakini simpati, narudi nyuma, lakini siwezi kumwona.

⁹Namtafuta upande wa kushoto lakini simwoni; nageukia kulia, lakini siwezi kumwona.

¹⁰Lakini yeye anajua njia ninayofuata; atakapomaliza kunijaribu nitatoka humo safi kama dhahabu.

¹¹Nafuata nyayo zake kwa uaminifu njia yake nimeishikilia wala sikupinda.

¹²Kamwe sijaacha kushika amri yake, maneno yake nimeyatunza moyoni mwangu.

¹³Lakini yeye habadiliki, nani awezaye kumgeuza? Analotaka, ndilo analofanya!

¹⁴Atanijulisha yote aliyonipangia; na mengi kama hayo yamo akilini mwake.

¹⁵Hivyo, natetemeka kwa hofu mbele yake; hata nikifikiria tu napatwa na woga.

¹⁶Mungu ameufanya moyo wangu ufifie, Mungu Mwenye Nguvu amenitia hofu.

¹⁷Maana nimekumbwa na giza, na giza nene limetanda usoni mwangu.[25]