Read Swahilli Yobu 24 Bible Online

Yobu 24 - Swahilli bible

Yobu 24

¹“Mbona Mungu Mwenye Nguvu haweki wakati maalumu wa hukumu; au kwa nini wamjuao hawazijui siku hizo zake?

²Watu wanaoondoa alama za mipaka ya mashamba, na wengine huiba mifugo na kuilisha.

³Huwanyanganya yatima punda wao, humweka rehani ng'ombe wa mjane.

⁴Huwasukuma maskini kando ya barabara; maskini wa dunia hujificha mbele yao.

⁵Kwa hiyo kama pundamwitu maskini hutafuta chakula jangwani wapate chochote cha kuwalisha watoto wao.

⁶Maskini wanalazimika kuokota mabaki ya mavuno mashambani, wanaokota katika mashamba ya mizabibu ya waovu.

⁷Usiku kucha hulala uchi bila nguo wakati wa baridi hawana cha kujifunikia.

⁸Wamelowa kwa mvua ya milimani, hujibanza miambani kujificha wasilowe.

⁹Wapo na wanaowanyakua watoto yatima vifuani mwa mama yao. Wengine huwaweka rehani watoto wa maskini.

¹⁰Watoto hao hufanywa waende uchi bila nguo, wakivuna ngano huku njaa imewabana,

¹¹wakiwatengenezea waovu mafuta yao, au kukamua divai bila hata kuionja.

¹²Kutoka mjini kilio cha wanaokufa chasikika, na walioumizwa hupaza sauti kuomba msaada; lakini Mungu hasikilizi kabisa sala zao.

¹³“Wapo wengine waovu wasiopenda mwanga, wasiozifahamu njia za mwanga, na hawapendi kuzishika njia zake.

¹⁴Mwuaji huamka mapema alfajiri, ili kwenda kuwaua maskini na fukara, na usiku ukifika, kazi yake ni kuiba.

¹⁵Mzinifu naye hungojea giza liingie; akisema, ‘Hakuna atakayeniona;’ kisha huuficha uso wake kwa nguo.

¹⁶Usiku wezi huvunja nyumba, lakini mchana hujifungia ndani; wala hawajui kabisa mwanga ni nini.

¹⁷Kwao wote giza nene ni mwanga wa asubuhi; wao ni marafiki wa vitisho vya giza nene.

¹⁸“Lakini mwasema: ‘Waovu huchukuliwa haraka na mafuriko ya maji, makao yao hubaki kuwa nchi iliyolaaniwa; hakuna aendaye kwenye mashamba yao ya mizabibu.’

¹⁹Kama theluji inavyoyeyuka katika joto na ukame ndivyo Kuzimu kunavyowanyakua waovu.

²⁰Maana mzazi wao huwasahau watu hao, hakuna atakayewakumbuka tena. Ndivyo uovu ulivyovunjwa kama mti.

²¹“Waovu huwadhulumu wanawake wasiopata watoto. Wala hawawatendei wema wanawake wajane.

²²Mungu, kwa nguvu yake huwaangamiza wenye uwezo, huinuka nao hukata tamaa ya kuishi.

²³Huwaacha waovu wajione salama, lakini macho yake huchunguza mienendo yao.

²⁴Waovu hufana kwa muda tu, kisha hutoweka, hunyauka na kufifia kama jani, hukatiliwa mbali kama masuke ya ngano.

²⁵Nani basi, awezaye kuhakikisha kuwa mimi ni mwongo na kuonesha kwamba maneno yangu si kweli?”