Read Swahilli Yobu 32 Bible Online

Yobu 32 - Swahilli bible

Yobu 32

¹Basi hawa watu watatu: Elifazi, Bildadi na Sofari, wakaacha kumjibu Yobu kwa vile alijiona kuwa mwema.

²Ndipo Elihu, mwana wa Barakeli, wa kabila la Buzi[33] wa ukoo wa Rama, akakasirika. Alimkasirikia Yobu kwa sababu Yobu alijiona yeye mwadilifu na sio Mungu.

³Pia, aliwakasirikia rafiki watatu wa Yobu kwa sababu hawakuwa na la kumjibu Yobu, na hivyo kuonesha kwamba Mungu amekosa.[34]

⁴Elihu alikuwa amekaa kimya wakati hao wazee waliposema na Yobu kwa kuwa yeye alikuwa kijana kuliko wao.

⁵Lakini alipoona hao watu watatu wameshindwa kumjibu Yobu, aliwaka hasira.

⁶Basi, Elihu mwana wa Barakeli, wa kabila la Buzi akaanza kusema: “Mimi ni kijana, nyinyi ni wazee zaidi; kwa hiyo niliogopa kuwaambieni mawazo yangu.

⁷Nilisema moyoni: ‘Waache wenye siku nyingi waseme, wenye miaka mingi wafundishe hekima.’

⁸Lakini hiyo roho iliyomo ndani ya mtu, hiyo pumzi ya Mungu Mwenye Nguvu, ndio inayomwezesha mwanadamu kufahamu.

⁹Si lazima kuwa mzee ili uwe na hekima wala wazee siyo wenye kufahamu lililo sawa.

¹⁰Kwa hiyo nasema, ‘Nisikilizeni, acheni nami nitoe maoni yangu.’

¹¹“Basi, mimi nilingojea mlichotaka kusema, nilisikiliza misemo yenu ya hekima, mlipokuwa mnajaribu kutafuta la kusema.

¹²Niliwasikiliza kwa makini sana, lakini hakuna mmoja wenu aliyemshinda Yobu; nyote mlishindwa kuyajibu maneno yake.

¹³Jihadharini msije mkasema, ‘Sasa tumepata hekima. Atakayemshinda ni Mungu, sio binadamu.’

¹⁴Maneno ya Yobu hayakuwa kwa ajili yangu, kwa hiyo sitamjibu kama mlivyomjibu nyinyi.

¹⁵“Nyinyi mmeduwaa; mmeshindwa, nyinyi hamna cha kusema zaidi.

¹⁶Je, ningoje tu kwa vile hamsemi, kwa sababu mnakaa tu bila kujibu kitu?

¹⁷Mimi pia nitatoa jibu langu; mimi nitatoa pia maoni yangu.

¹⁸Ninayo maneno mengi sana, roho yangu yanisukuma kusema.

¹⁹Moyo wangu umefurika kama divai iliyozibwa, kama kiriba cha divai mpya tayari kupasuka.

²⁰Ni lazima niseme ili nipate nafuu; yanipasa kufungua kinywa changu na kujibu.

²¹Sitampendelea mtu yeyote wala kutumia maneno ya kubembeleza mtu.

²²Maana mimi sijui kubembeleza mtu, la sivyo, Muumba wangu angeniangamiza.