Read Swahilli Yobu 35 Bible Online

Yobu 35 - Swahilli bible

Yobu 35

¹Kisha Elihu akaendelea kusema:

²“Je, Yobu, unaona jambo hili ni sawa na kufikiri kinyume cha Mungu

³ukiuliza: ‘Nimepata faida gani kama sikutenda dhambi? Nimefaidika kuliko kama ningalitenda dhambi?’

⁴Mimi nitakujibu wewe, na rafiki zako pia.

⁵Hebu zitazame mbingu! Tazama mawingu yaliyo juu kuliko wewe!

⁶ Ukitenda dhambi, je, Mungu ndiye unayemdhuru? Na kama ukizidisha makosa yako, wadhani unamwumiza?

⁷Kama wewe ni mwema, je, unampatia faida, au yeye anapokea kitu kutoka kwako?

⁸Uovu wako utamdhuru binadamu kama wewe, wema wako utamfaa binadamu mwenzako.

⁹“Kwa sababu ya udhalimu mwingi watu hulia, huomba msaada kwa sababu ya mapigo ya wenye nguvu.

¹⁰Lakini hakuna asemaye, ‘Yuko wapi Mungu, Muumba wangu, mwenye kunifanya niwe mchangamfu usiku,

¹¹anayetuelimisha kuliko wanyama, na kutufanya wenye hekima kuliko ndege!’

¹²Watu hao huomba msaada lakini Mungu hawajibu, kwa sababu ya majivuno ya watu waovu.

¹³Kweli Mungu hasikilizi kilio cha bure; Mungu Mwenye Nguvu hajali kilio hicho.

¹⁴Atakujibu vipi wakati wewe unasema kwamba humwoni na kwamba kesi yako iko mbele yake na wewe unamngojea!

¹⁵Sasa, kwa vile Mungu anazuia hasira yake, wala hajali sana makosa ya watu,

¹⁶Yobu unafungua mdomo kusema maneno matupu, unazidisha maneno bila akili.”