Read Swahilli Zaburi 119 Bible Online

Zaburi 119 - Swahilli bible

Zaburi 119

¹Heri watu wanaoishi bila kosa, wanaozingatia sheria ya Mwenyezi-Mungu.

²Heri wanaozingatia matakwa yake, wanaomtafuta kwa moyo wao wote,

³watu wasiotenda uovu kamwe, bali daima hufuata njia zake.

⁴Ee Mungu, umetupatia kanuni zako ili tuzishike kwa uaminifu.

⁵Laiti mwenendo wangu ungeimarika, kwa kuyafuata masharti yako!

⁶Nikizingatia amri zako zote, hapo kweli sitaaibishwa.

⁷Nitakusifu kwa moyo mnyofu, nikijifunza maagizo yako maadilifu.

⁸Nitayafuata masharti yako; usiniache hata kidogo.

⁹Kijana atatunzaje maisha yake kuwa safi? Kwa kuyaongoza kadiri ya neno lako.

¹⁰Najitahidi kukutii kwa moyo wote; usiniache nikiuke amri zako.

¹¹Nimeshika neno lako moyoni mwangu, nisije nikakukosea.

¹²Utukuzwe, ee Mwenyezi-Mungu! Unifundishe masharti yako.

¹³Nitayarudia kwa sauti maagizo yako yote uliyotoa.

¹⁴Nafurahi kufuata maamuzi yako, kuliko kuwa na utajiri mwingi.

¹⁵Nazitafakari kanuni zako, na kuzizingatia njia zako.

¹⁶Nayafurahia masharti yako; sitalisahau neno lako.

¹⁷Unitendee mimi mtumishi wako kwa ukarimu, nipate kuishi na kushika neno lako.

¹⁸Uyafumbue macho yangu, niyaone maajabu ya sheria yako.

¹⁹Mimi ni mkimbizi tu hapa duniani; usinifiche amri zako.

²⁰Roho yangu yaugua kwa hamu kubwa ya kutaka kujua daima maagizo yako.

²¹Wewe wawakemea wenye kiburi, walaanifu, ambao wanakiuka amri zako.

²²Uniepushe na matusi na madharau yao, maana nimeyazingatia maamuzi yako.

²³Hata kama wakuu wanakula njama dhidi yangu; mimi mtumishi wako nitayatafakari maamuzi yako.

²⁴Masharti yako ni furaha yangu; hayo ni washauri wangu.

²⁵Nagaagaa chini mavumbini; unipe tena uhai kama ulivyoahidi.

²⁶Nimeungama niliyotenda, nawe ukanijibu; unifundishe masharti yako.

²⁷Unifundishe namna ya kushika kanuni zako, nami nitayatafakari matendo[60] yako ya ajabu.

²⁸Niko hoi kwa uchungu; unirudishie nguvu kama ulivyoahidi.

²⁹Uniepushe na njia za upotovu; unifundishe kwa wema sheria yako.

³⁰Nimechagua njia ya uaminifu; nimezingatia maagizo yako.

³¹Nazingatia maamuzi yako, ee Mwenyezi-Mungu; usikubali niaibishwe!

³²Nitafuata maelekezo ya amri zako, maana unanipa maarifa zaidi.

³³Ee Mwenyezi-Mungu, unifundishe kutii masharti yako; nami nitayashika mpaka mwisho.

³⁴Unieleweshe nipate kuishika sheria yako, niifuate kwa moyo wangu wote.

³⁵Uniongoze katika njia ya amri zako, maana humo napata furaha yangu.

³⁶Unipe ari ya kuzingatia maamuzi yako, na si kwa ajili ya kupata faida isiyofaa.

³⁷Uniepushe, nisifuate mambo ya upuuzi; unioneshe njia yako, unipe uhai.

³⁸Unitimizie mimi mtumishi wako ahadi yako; ahadi unayowapa wale wanaokuheshimu.

³⁹Uniokoe na lawama ninazoogopa; maana maagizo yako ni mema.

⁴⁰Natamani sana kuzitii kanuni zako; unijalie uhai maana wewe ni mwadilifu.

⁴¹Fadhili zako zinijie, ee Mwenyezi-Mungu; uniokoe kama ulivyoahidi.

⁴²Hapo nitaweza kuwajibu hao wanaonitukana, maana mimi nina imani sana na neno lako.

⁴³Unijalie kusema ukweli wako daima, maana tumaini langu liko katika maagizo yako.

⁴⁴Nitatii sheria yako daima, nitaishika milele na milele.

⁴⁵Nitaishi katika uhuru kamili, maana nazitilia maanani kanuni zako.

⁴⁶Nitawatangazia wafalme maamuzi yako, wala sitaona aibu.

⁴⁷Furaha yangu ni kuzitii amri zako, ambazo mimi nazipenda.

⁴⁸Naziheshimu na kuzipenda amri zako; nitayatafakari masharti yako.

⁴⁹Ukumbuke ahadi yako kwangu mimi mtumishi wako, ahadi ambayo imenipa matumaini.

⁵⁰Hata niwapo taabuni napata kitulizo, maana ahadi yako yanipa uhai.

⁵¹Wasiomjali Mungu hunidharau daima, lakini mimi sikiuki sheria yako.

⁵²Ninapoyakumbuka maagizo yako ya tangu kale, nafarijika, ee Mwenyezi-Mungu.

⁵³Nashikwa na hasira kali, nionapo waovu wakivunja sheria yako.

⁵⁴Masharti yako yamekuwa wimbo wangu, nikiwa huku ugenini.

⁵⁵Usiku ninakukumbuka, ee Mwenyezi-Mungu, na kushika sheria yako.

⁵⁶Hii ni baraka kubwa kwangu, kwamba nazishika kanuni zako.

⁵⁷Wewe, ee Mwenyezi-Mungu, ndiwe riziki yangu kuu; naahidi kushika maneno yako.

⁵⁸Naomba radhi yako kwa moyo wangu wote; unionee huruma kama ulivyoahidi!

⁵⁹Nimeufikiria mwenendo wangu, na nimerudi nifuate maamuzi yako.

⁶⁰Bila kukawia nafanya haraka kuzishika amri zako.

⁶¹Waovu wametega mitego waninase, lakini mimi sisahau sheria yako.

⁶²Usiku wa manane naamka kukusifu, kwa sababu ya maagizo yako maadilifu.

⁶³Mimi ni rafiki ya wote wakuchao, rafiki yao wanaozitii kanuni zako.

⁶⁴Dunia imejaa fadhili zako, ee Mwenyezi-Mungu, unifundishe masharti yako.

⁶⁵Umenitendea vema mimi mtumishi wako, kama ulivyoahidi, ee Mwenyezi-Mungu.

⁶⁶Unifundishe akili na maarifa, maana nina imani sana na amri zako.

⁶⁷Kabla ya kuniadhibu nilikuwa nikikosea, lakini sasa nashika neno lako.

⁶⁸Wewe ni mwema na mfadhili; unifundishe masharti yako.

⁶⁹Wenye kiburi wanasema uongo juu yangu, lakini mimi nashika kanuni zako kwa moyo wote.

⁷⁰Mioyo yao imejaa upumbavu, lakini mimi nafurahia sheria yako.

⁷¹Nimefaidika kutokana na taabu yangu, maana imenifanya nijifunze masharti yako.

⁷²Sheria uliyoweka ni bora kwangu, kuliko mali zote za dunia.

⁷³Mikono yako iliniumba na kuniunda; unijalie akili nijifunze amri zako.

⁷⁴Wakuchao wataniona na kufurahi, maana tumaini langu liko katika neno lako.

⁷⁵Najua hukumu zako ni adili, ee Mwenyezi-Mungu, na kwamba umeniadhibu kwani wewe ni mwaminifu.

⁷⁶Fadhili zako na zinipe faraja, kama ulivyoniahidi mimi mtumishi wako.

⁷⁷Unionee huruma nipate kuishi, maana sheria yako ni furaha yangu.

⁷⁸Wenye kiburi waaibike kwa maana wamenifanyia hila, lakini mimi nitazitafakari kanuni zako.

⁷⁹Wote wakuchao na waje kwangu, wapate kuyajua maamuzi yako.

⁸⁰Moyo wangu na uzingatie masharti yako, nisije nikaaibishwa.

⁸¹Niko hoi kwa kukungojea uniokoe; naweka tumaini langu katika neno lako.

⁸²Macho yangu yanafifia nikingojea ulichoahidi. Nauliza: “Utakuja lini kunifariji?”

⁸³Nimekunjamana kama kiriba katika moshi, hata hivyo sijasahau masharti yako.

⁸⁴Mimi mtumishi wako nitasubiri mpaka lini? Utawaadhibu lini wale wanaonidhulumu?

⁸⁵Wenye kiburi wamenichimbia mashimo, watu ambao hawafuati sheria yako.

⁸⁶Amri zako zote ni za kuaminika; watu wananitesa bila haki; unisaidie!

⁸⁷Karibu wangefaulu kuniangamiza, lakini mimi sijavunja kanuni zako.

⁸⁸Unisalimishe kadiri ya fadhili zako, nipate kuzingatia maamuzi uliyotamka.

⁸⁹Neno lako, ee Mwenyezi-Mungu, ladumu milele; limethibitika juu mbinguni.

⁹⁰Uaminifu wako wadumu vizazi vyote, umeiweka dunia mahali pake nayo yadumu.

⁹¹Kwa amri yako viumbe vyote vipo leo, maana vitu vyote ni watumishi wako.

⁹²Kama sheria yako isingekuwa furaha yangu, ningalikwisha angamia kwa taabu zangu.

⁹³Sitasahau kamwe kanuni zako, maana kwa hizo umenipa uhai.

⁹⁴Mimi ni wako, uniokoe, maana nimejitahidi kuzishika kanuni zako.

⁹⁵Waovu wanivizia wapate kuniua; lakini mimi natafakari masharti yako.

⁹⁶Nimetambua kila kitu hufikia kikomo, lakini amri yako ni kamilifu.

⁹⁷Naipenda sana sheria yako! Naitafakari mchana kutwa!

⁹⁸Amri yako iko nami daima, yanipa hekima kuliko maadui zangu.

⁹⁹Ninaelewa kuliko waalimu wangu wote, kwa kuwa nayatafakari maamuzi yako.

¹⁰⁰Nawapita wazee kwa busara yangu, kwa sababu nazishika kanuni zako.

¹⁰¹Najizuia nisifuate njia mbaya, nipate kulizingatia neno lako.

¹⁰²Sikukiuka maagizo yako, maana wewe mwenyewe ulinifundisha.

¹⁰³Maneno yako ni matamu sana kwangu; naam, ni matamu kuliko asali!

¹⁰⁴Kwa kanuni zako napata hekima, kwa hiyo nachukia kila mwenendo mbaya.

¹⁰⁵Neno lako ni taa ya kuniongoza, na mwanga katika njia yangu.

¹⁰⁶Nimeapa na kuthibitisha kiapo changu, kwamba nitashika maagizo yako adili.

¹⁰⁷Ee Mwenyezi-Mungu, ninateseka mno; unijalie uhai kama ulivyoahidi.

¹⁰⁸Ee Mwenyezi-Mungu, upokee sala yangu ya shukrani; na kunifundisha maagizo yako.

¹⁰⁹Maisha yangu yamo hatarini daima, lakini siisahau sheria yako.

¹¹⁰Waovu wamenitegea mitego, lakini sikiuki kanuni zako.

¹¹¹Maamuzi yako ni riziki kubwa kwangu milele; hayo ni furaha ya moyo wangu.

¹¹²Nimekusudia kwa moyo wote kufuata masharti yako milele.

¹¹³Nawachukia watu wanafiki, lakini naipenda sheria yako.

¹¹⁴Wewe ni ngao yangu, kwako napata usalama; naweka tumaini langu katika neno lako.

¹¹⁵Ondokeni kwangu, enyi waovu, ili nipate kushika amri za Mungu wangu.

¹¹⁶Uniimarishe ulivyoahidi, nami nitaishi; usikubali niaibike katika tumaini langu.

¹¹⁷Unitegemeze, niwe salama; niwe daima msikivu kwa masharti yako.

¹¹⁸Unawakataa wote wanaokiuka masharti yako; mawazo yao maovu ni ya bure.

¹¹⁹Waovu wote wawaona kuwa takataka, kwa hiyo mimi napenda maamuzi yako.

¹²⁰Natetemeka kwa kukuogopa wewe; nimejaa hofu kwa sababu ya hukumu zako.

¹²¹Nimefanya mambo mema na adili; usiniache makuchani mwa maadui zangu.

¹²²Uahidi kunisaidia mimi mtumishi wako; usikubali wenye kiburi wanidhulumu.

¹²³Macho yangu yanafifia nikingojea uniokoe, nikingojea utimize uliyoahidi.

¹²⁴Unitendee mimi mtumishi wako kadiri ya wema wako, unifundishe masharti yako.

¹²⁵Mimi ni mtumishi wako, unipe maarifa, nipate kujua maamuzi yako.

¹²⁶Ee Mwenyezi-Mungu, sasa ni wakati wa kufanya kitu, kwa maana watu wanavunja sheria yako.

¹²⁷Mimi, nazipenda amri zako, kuliko hata dhahabu safi kabisa.

¹²⁸Kwa hiyo, nafuata kanuni zako zote;[61] kila njia potovu naichukia.

¹²⁹Maamuzi yako ni ya ajabu; kwa hiyo nayashika kwa moyo wote.

¹³⁰Maelezo ya mafundisho yako huleta mwanga; huwapa akili watu wasiojua kitu.

¹³¹Nafungua kinywa kwa hamu kubwa, maana ninatamani sana amri zako.

¹³²Unigeukie na kunionea huruma, kama uwatendeavyo wanaokupenda.

¹³³Uniimarishie hatua zangu kama ulivyoahidi; usikubali mimi nitawaliwe na uovu.

¹³⁴Unikomboe kutoka udhalimu wa binadamu, ili nipate kuzishika kanuni zako.

¹³⁵Uniangazie uso wako kwa wema, unifundishe masharti yako.

¹³⁶Macho yangu yabubujika machozi kama mto, kwa sababu watu hawaishiki sheria yako.

¹³⁷Ee Mwenyezi-Mungu, wewe ni mwadilifu; na hukumu zako ni za haki.

¹³⁸Umetoa maamuzi yako, kwa haki na uthabiti.

¹³⁹Upendo wangu kwako wanifanya niwake hasira, maana maadui zangu hawajali maneno yako.

¹⁴⁰Ahadi yako ni hakika kabisa, nami mtumishi wako naipenda.

¹⁴¹Mimi ni mdogo na ninadharauliwa; hata hivyo sisahau kanuni zako.

¹⁴²Uadilifu wako ni wa haki milele; sheria yako ni ya kweli.

¹⁴³Taabu na huzuni vimenipata, lakini amri zako ndizo furaha yangu.

¹⁴⁴Maamuzi yako ni ya haki daima; unijalie maarifa nipate kuishi.

¹⁴⁵Nakulilia kwa moyo wangu wote; unijibu, ee Mwenyezi-Mungu, nifuate kanuni zako.

¹⁴⁶Nakulilia, unisalimishe; nipate kuyazingatia maamuzi yako.

¹⁴⁷Naamka kabla ya pambazuko na kukuomba msaada; naweka tumaini langu katika maneno yako.

¹⁴⁸Nakaa macho usiku kucha, ili nitafakari juu ya maagizo yako.

¹⁴⁹Kwa fadhili zako, ee Mwenyezi-Mungu, unisikie; unisalimishe kwa uadilifu wako.

¹⁵⁰Wale wanaonidhulumu vibaya wanakaribia, hao wako mbali kabisa na sheria yako.

¹⁵¹Lakini wewe u karibu nami, ee Mwenyezi-Mungu, na amri zako zote ni za kuaminika.

¹⁵²Tangu zamani, nimejifunza maamuzi yako; ambayo umeyaweka hata yadumu milele.

¹⁵³Uangalie mateso yangu, uniokoe, kwa maana sikuisahau sheria yako.

¹⁵⁴Unitetee na kunikomboa; unijalie uhai kama ulivyoahidi.

¹⁵⁵Waovu hawataokolewa kamwe, maana hawajali juu ya masharti yako.

¹⁵⁶Huruma yako ni kubwa, ee Mwenyezi-Mungu, unijalie uhai kama ulivyoahidi.

¹⁵⁷Maadui na wadhalimu wangu ni wengi, lakini mimi sikiuki maamuzi yako.

¹⁵⁸Niwaonapo wahaini hao nachukizwa mno, kwa sababu hawazishiki amri zako.

¹⁵⁹Tazama, ee Mungu, ninavyozipenda kanuni zako! Unijalie uhai kadiri ya fadhili zako.

¹⁶⁰Kitovu cha neno lako ni ukweli, maagizo yako yote adili, yadumu milele.

¹⁶¹Wakuu wanidhulumu bila kisa, lakini mimi naheshimu maneno yako kwa moyo wote.

¹⁶²Nafurahi kwa sababu ya neno lako, kama mtu aliyekuta kitu cha thamani kuu.

¹⁶³Nachukia kabisa uongo, lakini naipenda sheria yako.

¹⁶⁴Nakusifu mara saba kila siku, kwa sababu ya maagizo yako adili.

¹⁶⁵Wapendao sheria yako wana amani kuu; hakuna kinachoweza kuwaangusha.

¹⁶⁶Ee Mwenyezi-Mungu, nakungojea uniokoe; mimi natimiza amri zako.

¹⁶⁷Nazingatia maamuzi yako; nayapenda kwa moyo wote.

¹⁶⁸Nazingatia kanuni na maamuzi yako; wewe wauona mwenendo wangu wote.

¹⁶⁹Kilio changu kikufikie, ee Mwenyezi-Mungu! Unijalie akili kama ulivyoahidi.

¹⁷⁰Ombi langu likufikie; uniokoe kama ulivyoahidi.

¹⁷¹Nitasema sifa zako mfululizo, maana wanifundisha masharti yako.

¹⁷²Nitaimba juu ya neno lako, maana amri zako zote ni za haki.

¹⁷³Uwe daima tayari kunisaidia, maana nimeamua kufuata kanuni zako.

¹⁷⁴Natazamia sana uniokoe, ee Mwenyezi-Mungu; sheria yako ndiyo furaha yangu.

¹⁷⁵Unijalie kuishi nipate kukusifu; na maagizo yako yanisaidie.

¹⁷⁶Natangatanga kama kondoo aliyepotea; uje kunitafuta mimi mtumishi wako, maana sikusahau amri zako.