Read Swahilli Zaburi 17 Bible Online

Zaburi 17 - Swahilli bible

Zaburi 17

¹(Sala ya Daudi) Ee Mwenyezi-Mungu usikie kisa changu cha haki, usikilize kilio changu, uitegee sikio sala yangu isiyo na hila.

²Haki yangu na ije kutoka kwako, kwani wewe wajua jambo lililo la haki.

³Wewe wajua kabisa moyo wangu; umenijia usiku, kunichunguza, umenitia katika jaribio; hukuona uovu ndani yangu, sikutamka kitu kisichofaa.

⁴Kuhusu matendo watendayo watu; mimi nimeitii amri yako, nimeepa njia ya wadhalimu.

⁵Nimefuata daima njia yako; wala sijateleza kamwe.

⁶Nakuita, ee Mungu, kwani wewe wanijibu; unitegee sikio, uyasikie maneno yangu.

⁷Onesha fadhili zako za ajabu, uwaokoe kutoka kwa adui zao, wale wanaokimbilia usalama kwako.

⁸Unilinde kama mboni ya jicho; unifiche kivulini mwa mabawa yako,

⁹mbali na mashambulio ya waovu, mbali na maadui zangu hatari wanaonizunguka.

¹⁰Hao hawana huruma yoyote moyoni; wamejaa maneno ya kujigamba.

¹¹Wananifuatia na kunizunguka; wananivizia waniangushe chini.

¹²Wako tayari kunirarua kama simba: Kama mwanasimba aviziavyo mawindo.

¹³Inuka, ee Mwenyezi-Mungu, uwakabili na kuwaporomosha. Kwa upanga uiokoe nafsi yangu kutoka kwa waovu.

¹⁴Kwa mkono wako, ee Mwenyezi-Mungu, uniokoe mikononi mwa watu hao, watu ambao riziki yao ni dunia hii tu. [8] Uwajaze adhabu uliyowawekea, wapate ya kuwatosha na watoto wao, wawaachie hata na wajukuu zao.

¹⁵Lakini mimi nitauona uso wako, kwani ni mwadilifu; niamkapo nitajaa furaha kwa kukuona.