Read Swahilli Zaburi 18 Bible Online

Zaburi 18 - Swahilli bible

Zaburi 18

¹(Kwa Mwimbishaji. Zaburi ya Daudi, mtumishi wa Mungu, aliyomwimbia Mungu wakati alipomwokoa mkononi mwa Shauli na adui wengine) Nakupenda, ee Mwenyezi-Mungu, nguvu yangu!

²Mwenyezi-Mungu ni mwamba wangu, ngome yangu na mkombozi wangu; Mungu wangu, mwamba wangu ninayemkimbilia usalama; ngao yangu, nguvu za wokovu wangu na ngome yangu.

³Namwita Mwenyezi-Mungu astahiliye sifa anisaidie, nami naokolewa kutoka kwa maadui zangu.

⁴Kamba za kifo zilinizingira, mawimbi ya maangamizi yalinivamia;

⁵kamba za kuzimu zilinizinga, mitego ya kifo ilinikabili.

⁶Katika taabu yangu nilimwita Mwenyezi-Mungu, nilimlilia Mungu wangu anisaidie. Aliisikia sauti yangu hekaluni mwake; kilio changu kilimfikia masikioni mwake.

⁷Hapo dunia ikatetemeka na kutikisika; misingi ya milima ikayumbayumba, kwani Mungu alikuwa amekasirika.

⁸Moshi ulifuka kutoka puani mwake, moto uunguzao ukatoka kinywani mwake; makaa ya moto yalilipuka kutoka kwake.

⁹Aliinamisha anga, akashuka chini; na wingu jeusi chini ya miguu yake.

¹⁰Alipanda kiumbe chenye mabawa[9] akaruka; akapaa kasi juu ya mabawa ya upepo.

¹¹Alijifunika giza pande zote, mawingu mazito yaliyojaa maji yalimzunguka.

¹²Umeme ulimulika mbele yake; kukatokea mawinguni mvua ya mawe na makaa ya moto.

¹³Mwenyezi-Mungu alinguruma kutoka mbinguni; Mungu Mkuu akatoa sauti yake, kukatokea mvua ya mawe na makaa ya moto.

¹⁴Aliwapiga maadui mishale yake, akawatawanya, alirusha umeme, akawatimua.

¹⁵Ulipowakemea maadui zako ee Mwenyezi-Mungu, ulipowatisha kwa ghadhabu yako, vilindi vya bahari vilifunuliwa, misingi ya dunia ikaonekana.

¹⁶Mungu alinyosha mkono kutoka juu akanichukua, kutoka katika maji mengi alininyanyua.

¹⁷Aliniokoa kutoka kwa maadui zangu wenye nguvu nyingi, aliniokoa kutoka kwa hao walionichukia, maana walikuwa na nguvu kunishinda.

¹⁸Walinivamia nilipokuwa taabuni, lakini Mwenyezi-Mungu alikuwa kinga yangu.

¹⁹Alinileta, akaniweka mahali pa usalama; alinisalimisha, kwani alipendezwa nami.

²⁰Mwenyezi-Mungu alinipa tuzo kadiri ya uadilifu wangu; alinituza kwa vile mikono yangu haina hatia.

²¹Maana nimefuata njia za Mwenyezi-Mungu, wala sikujitenga na Mungu wangu kwa uovu.

²²Nimeshika maagizo yake yote, sikuacha kufuata masharti yake.

²³Mbele yake sikuwa na hatia; nimejikinga nisiwe na hatia.

²⁴Mwenyezi-Mungu amenituza kadiri ya uadilifu wangu; yeye ajua kwamba mikono yangu haina hatia.

²⁵Wewe ni mwaminifu kwa walio waaminifu; mwema kwa wale walio wema.

²⁶Wewe ni mkamilifu kwa walio wakamilifu; lakini mkatili kwa watu walio waovu.

²⁷Wewe wawaokoa walio wanyenyekevu, lakini wenye majivuno huwaporomosha.

²⁸Wewe ee Mwenyezi-Mungu, waniangazia; walifukuza giza langu, ee Mwenyezi-Mungu, Mungu wangu.

²⁹Kwa msaada wako nakishambulia kikosi; wewe wanipa nguvu ya kuruka ukuta.

³⁰Huyu Mungu matendo yake hayana dosari! Ahadi ya Mwenyezi-Mungu ni ya kuaminika; yeye ni ngao kwa wote wanaomkimbilia usalama.

³¹Nani aliye Mungu isipokuwa Mwenyezi-Mungu? Nani aliye mwamba wa usalama ila Mungu wetu?

³²Mungu ndiye anijaliaye nguvu kila upande; ndiye anayeifanya salama njia yangu.

³³Ameiimarisha miguu yangu kama ya paa, na kuniweka salama juu ya vilele.

³⁴Hunifunza kupigana vita, mikono yangu iweze kuvuta upinde wa shaba.

³⁵Umenipa ngao yako ya kuniokoa; mkono wako wa kulia umenitegemeza; wema wako umenifanikisha.

³⁶Umenirahisishia njia yangu; wala miguu yangu haikuteleza.

³⁷Niliwafuatia adui zangu na kuwakamata; sikurudi nyuma mpaka nimewaangamiza.

³⁸Niliwaangusha chini wasiweze kuinuka tena; walianguka chini ya miguu yangu.

³⁹Wewe ulinijalia nguvu ya kupigana vita; uliwaporomosha maadui chini yangu.

⁴⁰Uliwafanya maadui zangu wakimbie, na wale walionichukia niliwaangamiza.

⁴¹Walipiga yowe lakini hapakuwa na wa kuwaokoa; walimlilia Mwenyezi-Mungu lakini hakuwajibu.

⁴²Niliwatwanga wakawa kama vumbi inayopeperushwa na upepo; niliwakanyaga[10] kama tope la njiani.

⁴³Wewe uliniokoa na mashambulizi ya watu, ukanifanya mtawala wa mataifa. Watu nisiowajua walinitumikia.

⁴⁴Mara waliposikia habari zangu walinitii. Wageni walinijia wakinyenyekea.

⁴⁵Wageni walikufa moyo; wakaja kutoka ngome zao wakitetemeka.

⁴⁶Mwenyezi-Mungu yu hai! Asifiwe mwamba wa usalama wangu; atukuzwe Mungu wa wokovu wangu.

⁴⁷Yeye ameniwezesha kulipiza kisasi; na kuyashinda mataifa chini yangu.

⁴⁸Ameniokoa kutoka kwa maadui zangu, akanikuza juu ya wapinzani wangu, na kunisalimisha mbali na watu wakatili.

⁴⁹ Kwa hiyo nitakutukuza kati ya mataifa, ee Mwenyezi-Mungu nitaliimbia sifa jina lako.

⁵⁰Mungu humjalia mfalme wake ushindi mkubwa; humwonesha fadhili zake huyo mteule wake, naam, humfadhili Daudi na wazawa wake milele.