Read Swahilli Zaburi 21 Bible Online

Zaburi 21 - Swahilli bible

Zaburi 21

¹(Kwa Mwimbishaji. Zaburi ya Daudi) Mfalme ashangilia, ee Mwenyezi-Mungu, kwa nguvu yako, anafurahi mno kwa msaada uliompa.

²Umemtimizia matakwa ya moyo wake; wala hukumkatalia ombi lake.

³Umemjia, ukampa baraka nzurinzuri; umemvika taji ya dhahabu safi kichwani mwake.

⁴Alikuomba maisha nawe ukampa; ulimpa maisha marefu milele na milele.

⁵Kwa msaada wako ametukuka sana; wewe umemjalia fahari na heshima.

⁶Wamjalia baraka zako daima; wamfurahisha kwa kuwako kwako.

⁷Mfalme anamtumainia Mwenyezi-Mungu; kwa fadhili za Mungu Mkuu atakuwa salama.

⁸Mkono wako ewe mfalme utawakamata maadui zako wote; mkono wako wa kulia utawakamata wanaokuchukia.

⁹Utakapotokea utawaangamiza kama kwa tanuri ya moto. Mwenyezi-Mungu atawamaliza kwa hasira yake, moto utawateketeza kabisa.

¹⁰Utawaangamiza wazawa wao kutoka duniani; watoto wao hawatasalia kati ya binadamu.

¹¹Hata kama wakipanga maovu dhidi yako, kama wakitunga mipango ya hila, kamwe hawataweza kufaulu.

¹²Kwa maana wewe utawatimua mbio, utawalenga usoni kwa mishale yako.

¹³Utukuzwe ee Mwenyezi-Mungu kwa sababu ya nguvu yako! Tutaimba na kuusifu uwezo wako.