Read Swahilli Zaburi 33 Bible Online

Zaburi 33 - Swahilli bible

Zaburi 33

¹Shangilieni kwa sababu ya Mwenyezi-Mungu enyi waadilifu! Kumsifu Mungu ni wajibu wa watu wanyofu.

²Msifuni Mwenyezi-Mungu kwa zeze; mwimbieni kwa kinubi cha nyuzi kumi.

³Mwimbieni wimbo mpya; pigeni kinubi vizuri na kushangilia.

⁴Neno la Mwenyezi-Mungu ni la kweli; na matendo yake yote ni ya kuaminika.

⁵Mungu apenda uadilifu na haki, dunia imejaa fadhili za Mwenyezi-Mungu.

⁶Mbingu ziliumbwa kwa neno la Mwenyezi-Mungu, na vyote vilivyomo kwa pumzi ya mdomo wake.

⁷Alikusanya maji ya bahari kama katika chupa, vilindi vya bahari akavifunga ghalani.

⁸Dunia yote na imwogope Mwenyezi-Mungu! Wakazi wote duniani, wamche!

⁹Maana alisema na ulimwengu ukawako; alitoa amri nao ukajitokeza.

¹⁰Mwenyezi-Mungu hupangua mipango ya mataifa, na kuyatangua mawazo yao.

¹¹Mpango wa Mwenyezi-Mungu hudumu milele; maazimio yake yadumu vizazi vyote.

¹²Heri taifa ambalo Mungu wake ni Mwenyezi-Mungu; heri wale aliowachagua kuwa watu wake mwenyewe!

¹³Mwenyezi-Mungu huangalia chini kutoka mbinguni, na kuwaona wanadamu wote.

¹⁴Kutoka kwenye kiti chake cha enzi, huwaangalia wakazi wote wa dunia.

¹⁵Yeye huunda mioyo ya watu wote, yeye ajua kila kitu wanachofanya.

¹⁶Mfalme hawezi kuokolewa kwa kuwa na jeshi kubwa; wala shujaa hapati ushindi kwa nguvu zake kubwa.

¹⁷Farasi wa vita hafai kitu kwa kupata ushindi; nguvu zake nyingi haziwezi kumwokoa mtu.

¹⁸Mwenyezi-Mungu huwaangalia wale wamchao, watu ambao wanatumainia fadhili zake.

¹⁹Yeye huwaokoa katika kifo, huwaweka hai wakati wa njaa.

²⁰Mioyo yetu yamtumainia Mwenyezi-Mungu. Yeye ni msaada wetu na ngao yetu.

²¹Naam twafurahi kwa sababu yake; tuna matumaini katika jina lake takatifu.

²²Fadhili zako zikae nasi, ee Mwenyezi-Mungu, kwani sisi tumekuwekea tumaini letu.