Read Swahilli Zaburi 35 Bible Online

Zaburi 35 - Swahilli bible

Zaburi 35

¹(Zaburi ya Daudi) Ee Mwenyezi-Mungu, uwapinge hao wanaonipinga; uwashambulie hao wanaonishambulia.

²Utwae ngao yako na kingio lako, uinuke uje ukanisaidie!

³Chukua mkuki na sime yako dhidi ya wanaonifuatia. Niambie mimi kwamba utaniokoa.

⁴Waone haya na kuaibika, hao wanaoyanyemelea maisha yangu! Warudishwe nyuma kwa aibu, hao wanaozua mabaya dhidi yangu.

⁵Wawe kama makapi yapeperushwayo na upepo, wakikimbizwa na malaika wa Mwenyezi-Mungu!

⁶Njia yao iwe ya giza na utelezi, wakifukuzwa na malaika wa Mwenyezi-Mungu!

⁷Maana walinitegea mitego bila sababu; walinichimbia shimo bila kisa chochote.

⁸Maangamizi yawapate wao kwa ghafla, wanaswe katika mtego wao wenyewe, watumbukie humo na kuangamia!

⁹Hapo mimi nitafurahi kwa sababu ya Mwenyezi-Mungu; nitashangilia kwa kuwa yeye ameniokoa.

¹⁰Nitamwambia Mwenyezi-Mungu kwa moyo wangu wote: “Wewe ee Mwenyezi-Mungu, hakuna aliye kama wewe! Wewe wawaokoa wanyonge makuchani mwa wenye nguvu, maskini na fukara mikononi mwa wanyanganyi.”

¹¹Mashahidi wakorofi wanajitokeza; wananiuliza mambo nisiyoyajua.

¹²Wananilipa mema yangu kwa mabaya; nami binafsi nimebaki katika ukiwa.

¹³Lakini wao walipokuwa wagonjwa, mimi nilivaa magunia kuonesha huzuni; nilijitesa kwa kujinyima chakula. Nilisali nikiwa nimeinamisha kichwa,

¹⁴kana kwamba namlilia rafiki au ndugu yangu. Nilikwenda huko na huko kwa huzuni, kama mtu anayeomboleza kifo cha mama yake.

¹⁵Lakini mimi nilipoanguka walikusanyika kunisimanga. Walikusanyika pamoja dhidi yangu. Watu nisiowajua walinirarua bila kukoma, wala hakuna aliyewazuia.

¹⁶Watu ambao huwadhihaki vilema, walinisagia meno yao kwa chuki.

¹⁷Ee Mwenyezi-Mungu, utatazama tu mpaka lini? Uniokoe kutoka kwenye mashambulio yao; uyaokoe maisha yangu na simba hao.

¹⁸Hapo nitakushukuru kati ya kusanyiko kubwa la watu; nitakutukuza kati ya jumuiya kubwa ya watu.

¹⁹ Usiwaache maadui hao wabaya wanisimange, hao wanichukiao bure wafurahie mateso yangu.

²⁰Maneno wasemayo si ya amani, wanazua maneno ya hila dhidi ya wananchi watulivu.

²¹Wananishtaki kwa sauti: “Haya! Haya! Tumeona wenyewe uliyotenda!”

²²Lakini wewe Mwenyezi-Mungu waona jambo hilo, usinyamaze, ee Mwenyezi-Mungu, usikae mbali nami.

²³Uinuke, ee Mwenyezi-Mungu, ukanitetee; uje, ee Mungu wangu, uangalie kisa changu.

²⁴Ee Mwenyezi-Mungu, Mungu wangu, unitetee, ufanye kulingana na uadilifu wako; usiwaache maadui zangu wanisimange.

²⁵Usiwaache wajisemee: “Tumefanikiwa tulivyotaka!” Au waseme: “Tumemmaliza huyu!”

²⁶Waache hao wanaofurahia maafa yangu, washindwe wote na kufedheheka. Hao wote wanaojiona wema kuliko mimi, waone haya na kuaibika.

²⁷Lakini wanaotaka kuona kuwa sina hatia, wapaaze sauti kwa furaha waseme daima: “Mwenyezi-Mungu ni mkuu mno! Hupendezwa na fanaka ya mtumishi wake.”

²⁸Hapo nami nitatangaza uadilifu wako; nitasema sifa zako mchana kutwa.