Read Swahilli Zaburi 39 Bible Online

Zaburi 39 - Swahilli bible

Zaburi 39

¹(Kwa Mwimbishaji: Mtindo wa Yeduthuni. Zaburi ya Daudi) Nilisema: “Nitayachunga maisha yangu, nisije nikatenda dhambi kwa usemi wangu. Nitafunga mdomo wangu waovu wawapo karibu nami.”

²Nilikuwa kama bubu, bila kusema kitu, nilinyamaza lakini sikupata nafuu. Mateso yangu yalizidi kuwa makali,

³mahangaiko yangu yakaniunguza moyoni. Kadiri nilivyowaza ndivyo nilivyotaabika, kisha maneno haya yakanitoka:

⁴“Ee Mwenyezi-Mungu, unijulishe mwisho wangu, siku zangu za kuishi zimenibakia ngapi, nijue yapitavyo kasi maisha yangu!”

⁵Kumbe umenipimia maisha mafupi sana! Maisha yangu si kitu mbele yako. Hakika, kila binadamu ni kama pumzi tu!

⁶Kweli, kila mtu anapita kama kivuli; jitihada zake zote ni bure tu; anakusanya mali, asijue atakayeipata!

⁷Na sasa, ee Bwana, ninatazamia nini? Tumaini langu ni kwako wewe!

⁸Uniokoe katika makosa yangu yote; usikubali wapumbavu wanidhihaki.

⁹Niko kama bubu, sisemi kitu, kwani wewe ndiwe uliyetenda hayo.

¹⁰Usiniadhibu tena; namalizika kwa mapigo yako.

¹¹Unapomwadhibu mtu dhambi zake kwa kumkemea, unaharibu kama nondo kile akipendacho. Hakika, kila binadamu ni kama pumzi tu!

¹²Usikie sala yangu, ee Mwenyezi-Mungu; usikilize kilio changu, usikae kimya ninapolia. Maana, mimi ni kama mgeni tu apitaye, ni msafiri kama walivyokuwa wazee wangu wote.

¹³Uache kunitazama nipate kufurahi kidogo, kabla sijaaga dunia, na kutoweka kabisa.