Read Swahilli Zaburi 45 Bible Online

Zaburi 45 - Swahilli bible

Zaburi 45

¹[21] (Kwa Mwimbishaji: Mtindo wa Yungiyungi. Utenzi wa Wakorahi; utenzi wa mapenzi) Moyo wangu umejaa mawazo mema: Namtungia mfalme shairi langu, ulimi wangu ni kama kalamu ya mwandishi stadi.

²Wewe u mzuri kuliko wanadamu wote, maneno yako ni fadhili tupu. Kwa hiyo Mungu amekubariki milele.

³Jifunge upanga wako, ewe shujaa! Wewe ni mtukufu na mwenye fahari.

⁴Songa mbele kwa utukufu upate ushindi, utetee ukweli na kulinda haki. Mkono wako utende mambo makuu.

⁵Mishale yako ni mikali, hupenya mioyo ya maadui za mfalme; nayo mataifa huanguka chini yako.

⁶ Kiti chako cha enzi ni imara,[22] chadumu milele kama cha Mungu. Wewe watawala watu wako kwa haki.

⁷Wapenda uadilifu na kuchukia uovu. Kwa hiyo Mungu, Mungu wako, amekuteua, na kukupa furaha kuliko wenzako.

⁸Mavazi yako yanukia marashi na udi, wanamuziki wakuimbia katika majumba ya pembe za ndovu.

⁹Binti za wafalme ni baadhi ya wanaokulaki, naye malkia amesimama kulia kwako, amevaa mapambo ya dhahabu safi ya Ofiri.

¹⁰Sikiliza binti, ufikirie! Tega sikio lako: Sahau sasa watu wako na jamaa zako.

¹¹Uzuri wako wamvutia mfalme; yeye ni bwana wako, lazima umtii.

¹²Watu wa Tiro watakuletea zawadi; matajiri watataka upendeleo wako.

¹³Binti mfalme anaingia mzuri kabisa! Vazi lake limefumwa kwa nyuzi za dhahabu.

¹⁴Akiwa amevalia vazi la rangi nyingi, anaongozwa kwa mfalme, akisindikizwa na wasichana wenzake; nao pia wanapelekwa kwa mfalme.

¹⁵Kwa furaha na shangwe wanafika huko, na kuingia katika jumba la mfalme.

¹⁶Ee mfalme, utapata watoto wengi watakaotawala mahali pa wazee wako; utawafanya watawale duniani kote.

¹⁷Nitalifanya jina lako litukuzwe katika vizazi vyote, nayo mataifa yatakusifu daima na milele.