Read Swahilli Zaburi 48 Bible Online

Zaburi 48 - Swahilli bible

Zaburi 48

¹(Kwa Mwimbishaji. Zaburi ya Wakorahi) Mwenyezi-Mungu, ni mkuu; astahili kusifiwa sana katika mji wake na mlima wake mtakatifu.

² Mlima Siyoni huko kaskazini, wapendeza kwa urefu; mji wa Mfalme mkuu ni furaha ya ulimwengu.

³Mungu anazilinda ngome zake; yeye amejionesha kuwa ngome ya usalama.

⁴Wafalme walikusanyika, wakaenda pamoja kushambulia.

⁵Lakini walipouona mji wa Siyoni, wakashangaa; wakashikwa na hofu, wakatimua mbio.

⁶Hofu kuu iliwashika, wakasikia uchungu kama mama anayejifungua,

⁷kama waliokumbwa na kimbunga cha mashariki ambacho huzivunjavunja meli za Tarshishi.

⁸Yote tuliyosikia tumejionea wenyewe katika mji wa Mwenyezi-Mungu wa majeshi, naam, katika mji wa Mungu wetu; Mungu atauimarisha milele.

⁹Ee Mungu, twazitafakari fadhili zako, tukiwa hekaluni mwako.

¹⁰Jina lako lasifika kila mahali, sifa zako zaenea popote duniani. Kwa mkono wako umetenda kwa haki;

¹¹watu wa Siyoni na wafurahi! Watu wa Yuda na washangilie, kwa sababu ya maamuzi yako ya haki!

¹²Tembeeni huko Siyoni mkauzunguke, mkaihesabu minara yake.

¹³Zitazameni kuta zake na kuchunguza ngome zake; mpate kuvisimulia vizazi vijavyo, kwamba:

¹⁴“Huyu ni Mungu, Mungu wetu milele! Atakuwa kiongozi wetu milele!”