Read Swahilli Zaburi 49 Bible Online

Zaburi 49 - Swahilli bible

Zaburi 49

¹(Kwa Mwimbishaji. Zaburi ya Wakorahi) Sikieni jambo hili enyi watu wote! Tegeni sikio enyi wakazi wote wa dunia;

²sikilizeni nyote, wakubwa kwa wadogo, matajiri na maskini kwa pamoja.

³Maneno yangu yatakuwa mazitomazito; mimi nitasema maneno ya hekima.

⁴Nitatega sikio nisikilize methali, nitafafanua kitendawili kwa muziki wa zeze.

⁵Ya nini niogope siku mbaya, wakati nizungukwapo na uovu wa adui?

⁶Watu waovu hutegemea mali zao, hujisifia wingi wa utajiri wao.

⁷Lakini binadamu hawezi kamwe kujikomboa mwenyewe; hawezi kumlipa Mungu bei ya maisha yake,

⁸maana fidia ya maisha ni kubwa mno. Hawezi kutoa kitu chochote kinachotosha,

⁹kimwezeshe aendelee kuishi daima, asipate kuonja kaburi.

¹⁰Yeye afahamu kuwa hata wenye hekima hufa, wapumbavu hali kadhalika na watu wajinga. Wote hao huwaachia wengine mali zao.

¹¹Makaburi ni makao yao hata milele; ni makao yao vizazi hata vizazi, ingawa hapo awali walimiliki ardhi.

¹²Binadamu hatadumu katika fahari yake; atakufa tu kama mnyama.

¹³Hayo ndiyo yawapatao wanaojiamini kipumbavu, ndio mwisho wa wale wanaojivunia mali zao.

¹⁴Wataongozwa kama kondoo hadi kuzimu, kifo kitakuwa mchungaji wao. Watashuka moja kwa moja kaburini. Miili yao itaozea huko, Kuzimu kutakuwa makao yao.[23]

¹⁵Lakini Mungu ataniokoa na kuzimu. Atanisalimisha kutoka huko.

¹⁶Usihangaike ukiona mtu anatajirika, wala mali yake ikiongezeka zaidi na zaidi.

¹⁷Maana atakapokufa hatachukua chochote, mali yake haitashuka huko chini pamoja naye.

¹⁸Ajapojikuza katika maisha haya, na kusifiwa kwa sababu ya kufanikiwa,

¹⁹atajiunga na wazee waliomtangulia kufa, ambao hawawezi kuona tena mwanga.

²⁰Binadamu hatadumu milele katika fahari yake, atakufa tu kama mnyama.