Read Swahilli Zaburi 50 Bible Online

Zaburi 50 - Swahilli bible

Zaburi 50

¹(Zaburi ya Asafu) Mungu wa nguvu[24] Mwenyezi-Mungu, amenena, amewaita wakazi wa dunia, tokea mawio ya jua hadi machweo yake.

²Kutoka Siyoni, mji mzuri mno, Mungu anajitokeza, akiangaza.

³Mungu wetu anakuja, na sio kimyakimya: Moto uunguzao wamtangulia, na dhoruba kali yamzunguka.

⁴Kutoka juu anaziita mbingu na dunia; zishuhudie akiwahukumu watu wake:

⁵“Nikusanyieni waaminifu wangu, waliofanya agano nami kwa tambiko!”

⁶Mbingu zatangaza uadilifu wa Mungu; kwamba Mungu mwenyewe ni hakimu.

⁷“Sikilizeni watu wangu, ninachosema! Israeli, natoa ushahidi dhidi yako. Mimi ni Mungu! Mimi ni Mungu wako!

⁸Sikukaripii kwa sababu ya tambiko zako; hujaacha kunitolea tambiko za kuteketeza.

⁹Kwa kweli sina haja na fahali wa zizi lako, wala beberu wa mifugo yako;

¹⁰maana wanyama wote porini ni mali yangu, na maelfu ya wanyama milimani ni wangu.

¹¹Ndege wote wa mwitu ni mali yangu, na viumbe vyote hai mashambani ni vyangu.

¹²Kama ningeona njaa singekuambia wewe, maana ulimwengu na vyote vilivyomo ni vyangu.

¹³Je, wadhani nala nyama ya fahali, au Kunywa damu ya mbuzi?

¹⁴Shukrani iwe ndio tambiko yako kwa Mungu mtimizie Mungu Aliye Juu ahadi zako.

¹⁵Uniite wakati wa taabu, nami nitakuokoa, nawe utaniheshimu.”

¹⁶Lakini Mungu amwambia mtu mwovu: “Ya nini kuzitajataja tu sheria zangu? Kwa nini unasemasema juu ya agano langu?

¹⁷Wewe wachukia kuwa na nidhamu, na maneno yangu hupendi kuyafuata.

¹⁸Ukimwona mwizi unaandamana naye, na wazinzi unashirikiana nao.

¹⁹Uko tayari daima kunena mabaya; kazi ya ulimi wako ni kutunga uongo.

²⁰Wakaa kitako kumsengenya binadamu mwenzako, naam, kumchongea ndugu yako mwenyewe.

²¹Umefanya hayo yote nami nimenyamaa. Je, wadhani kweli mimi ni kama wewe? Lakini sasa ninakukaripia, ninakugombeza waziwazi.

²²“Fikirini vizuri jambo hili, enyi msionijali, la sivyo nitawaangamizeni, wala hapatakuwa na wa kuwaokoeni.

²³Anayenipa shukrani kama tambiko yake, huyo ndiye anayeniheshimu; yeyote anayedumu katika njia yangu, huyo ndiye nitakayemwokoa.”