Read Swahilli Zaburi 51 Bible Online

Zaburi 51 - Swahilli bible

Zaburi 51

¹(Kwa Mwimbishaji. Zaburi ya Daudi baada ya kukemewa na nabii Nathani kwa kosa lake na Bathsheba) Nihurumie, Ee Mungu, kadiri ya fadhili zako; ufutilie mbali makosa yangu, kadiri ya wingi wa huruma yako.

²Unioshe kabisa hatia yangu; unisafishe dhambi yangu.

³Nakiri kabisa makosa yangu, daima naiona waziwazi dhambi yangu.

⁴ Nimekukosea wewe peke yako, nimetenda yaliyo mabaya mbele yako. Uamuzi wako ni wa haki hukumu yako haina lawama.

⁵Mimi ni mkosefu tangu kuzaliwa kwangu, mwenye dhambi tangu tumboni mwa mama yangu.

⁶Wewe wataka unyofu wa ndani; hivyo nifundishe hekima moyoni.

⁷Unitakase kwa husopo,[25] nitakate; unioshe niwe mweupe pe.

⁸Nijaze furaha na shangwe, nifurahishe tena, mimi ambaye uliniponda.

⁹Ugeuke, usiziangalie dhambi zangu; uzifute hatia zangu zote.

¹⁰Uniumbie moyo safi, ee Mungu, uweke ndani yangu roho mpya na thabiti.

¹¹Usinitupe mbali nawe; usiniondolee roho yako takatifu.

¹²Unifanye nifurahi tena kwa kuniokoa, utegemeze ndani yangu moyo wa utii.

¹³Hapo nitawafunza wakosefu njia yako, nao wenye dhambi watarudi kwako.

¹⁴Uniokoe na hatia ya umwagaji damu, ee Mungu, Mungu mwokozi wangu, nami nitaimba kwa sauti kuwa umeniokoa.

¹⁵Uniwezeshe kusema, ee Bwana, midomo yangu itangaze sifa zako.

¹⁶Kwa kweli wewe hupendezwi na tambiko, ama sivyo mimi ningalikutolea. Wewe huna haja na tambiko za kuteketezwa.

¹⁷tambiko yangu kwako ee Mungu, ni moyo mnyofu; wewe, ee Mungu, hukatai moyo mnyofu na mtiifu.

¹⁸Ee Mungu, upende kuutendea mema mji wa Siyoni; uzijenge tena upya kuta za mji wa Yerusalemu.

¹⁹Hapo utapendezwa na tambiko za kweli: Sadaka za kuteketezwa na za kuteketezwa nzima; mafahali watatolewa tambiko madhabahuni pako.