Read Swahilli Zaburi 56 Bible Online

Zaburi 56 - Swahilli bible

Zaburi 56

¹(Kwa Mwimbishaji: Mtindo “Njiwa Mkimya wa Mbali”. Utenzi wa Daudi baada ya kukamatwa na Wafilisti kule Gathi) Ee Mungu, unionee huruma, maana watu wananishambulia. Mchana kutwa maadui wananidhulumu.

²Mchana kutwa maadui zangu wananishambulia; ni wengi mno hao wanaonipiga vita.

³Ee Mungu Mkuu, hofu inaponishika, mimi nakutumainia wewe.

⁴Namtumainia Mungu na kusifu neno lake; namtumainia Mungu, wala siogopi. Binadamu dhaifu atanifanya nini?

⁵Mchana kutwa wanapotosha kisa changu; mawazo yao yote ni ya kunidhuru.

⁶Wanakutana kupanga na kunivizia; wanachunguza yote nifanyayo; wananiotea kwa shabaha ya kuniua.

⁷Ee Mungu, uwalipe kwa kadiri ya uovu wao, uwaangushe hao waovu kwa hasira yako.

⁸Wewe wakujua kusukwasukwa kwangu; waweka kumbukumbu ya machozi yangu yote. Je, yote si yamo kitabuni mwako?

⁹Kila mara ninapokuomba msaada wako, maadui zangu wanarudishwa nyuma. Najua kweli Mungu yuko upande wangu.

¹⁰Namtumaini Mungu na kusifu neno lake; namtumainia Mwenyezi-Mungu na kusifu neno lake.

¹¹Namtumainia Mungu, wala siogopi. Binadamu atanifanya nini?

¹²Ee Mungu, nitatimiza ahadi zangu kwako; nitakutolea tambiko za shukrani,

¹³Maana umeniokoa katika kifo, naam, umenilinda nisianguke chini; nipate kuishi mbele yako, ee Mungu, katika mwanga wa uhai.