Read Swahilli Zaburi 60 Bible Online

Zaburi 60 - Swahilli bible

Zaburi 60

¹(Kwa Mwimbishaji: Mtindo wa Shushani Edut. Utenzi wa Daudi wa kufundisha, wakati alipopigana na Waaramu kutoka Naharaimu na Zoba, Yoabu aliporudi nyuma na kuwaua Waedomu 12,000 katika Bonde la Chumvi) Ee Mungu, umetutupa na kutuponda, umewaka hasira, tafadhali uturudishie nguvu.

²Umeitetemesha nchi na kuipasua; uzibe nyufa zake kwani inabomoka.

³Umewatwika watu wako mateso; tunayumbayumba kama waliolewa divai.

⁴Uwape ishara wale wanaokuheshimu, wapate kuuepa mshale.

⁵Uwasalimishe hao watu uwapendao; utuokoe kwa mkono wako, na kutusikiliza.

⁶Mungu amesema kutoka patakatifu pake “Sasa nitaigawa Shekemu kwa shangwe, Bonde la Sukothi nitalipima sehemusehemu.

⁷Gileadi ni yangu, na Manase ni yangu; Efraimu ni kofia yangu ya chuma, na Yuda ni fimbo yangu ya enzi.

⁸Moabu ni kama bakuli langu la kunawia, kiatu changu nitaitupia Edomu kuimiliki. Nitapiga kelele ya ushindi juu ya Filistia.”

⁹Ni nani atakayenipeleka kwenye mji wa ngome? Ni nani atakayeniongoza mpaka Edomu?

¹⁰Je, umetuacha kabisa, ee Mungu? Wewe huendi tena na majeshi yetu!

¹¹Utupatie msaada dhidi ya maadui zetu, maana msaada wa binadamu haufai kitu.

¹²Mungu akiwa upande wetu tutashinda, yeye atawaponda maadui zetu.