Read Swahilli Zaburi 68 Bible Online

Zaburi 68 - Swahilli bible

Zaburi 68

¹(Kwa Mwimbishaji. Zaburi ya Daudi) Mungu ainuka, na maadui zake watawanyika; wanaomchukia wakimbia mbali naye!

²Kama moshi unavyopeperushwa na upepo, ndivyo anavyowapeperusha; kama nta inavyoyeyuka karibu na moto, ndivyo waovu wanavyoangamia mbele ya Mungu!

³Lakini waadilifu hufurahi ajapo Mungu, hushangilia na kuimba kwa furaha.

⁴Mwimbieni Mungu, lisifuni jina lake; mtengenezeeni njia yake apandaye mawinguni.[33] Jina lake ni Mwenyezi-Mungu; furahini mbele yake.

⁵Mungu akaaye mahali pake patakatifu, ni Baba wa yatima na mlinzi wa wajane.

⁶Mungu huwapa fukara makao ya kudumu, huwafungua wafungwa na kuwapa fanaka. Lakini waasi wataishi katika nchi kame.

⁷Ee Mungu, ulipowaongoza watu wako, uliposafiri kule jangwani,

⁸dunia ilitetemeka, mbingu zilitiririsha mvua; kwa kuweko kwako, Mungu wa Sinai, naam, kwa kuweko kwako, Mungu wa Israeli!

⁹Ee Mungu, uliinyeshea nchi mvua nyingi, uliiburudisha nchi yako ilipokuwa imechakaa.

¹⁰Watu wako wakapata humo makao; ukawaruzuku maskini kwa wema wako.

¹¹Bwana alitoa amri, nao wanawake wengi wakatangaza habari:

¹²“Wafalme na majeshi yao wanakimbia ovyo!” Kina mama majumbani waligawana nyara,

¹³ingawa walibaki mazizini: Sanamu za njiwa wa madini ya fedha, na mabawa yao yanangaa kwa dhahabu.

¹⁴Mungu Mwenye Nguvu alipowatawanya wafalme huko, theluji ilianguka juu ya mlima Salmoni.

¹⁵Ewe mlima mrefu, mlima wa Bashani, ewe mlima wa vilele vingi, mlima wa Bashani!

¹⁶Mbona unauonea kijicho mlima aliochagua Mungu akae juu yake? Mwenyezi-Mungu atakaa huko milele!

¹⁷Akiwa na msafara mkubwa, maelfu na maelfu ya magari ya kukokotwa, Bwana anakuja patakatifuni pake kutoka Sinai.

¹⁸Anapanda juu akichukua mateka; anapokea zawadi kutoka kwa watu, hata kutoka kwa watu walioasi; Mwenyezi-Mungu apate kukaa huko.[34]

¹⁹Mwenyezi-Mungu asifiwe siku kwa siku! Yeye hutubebea mizigo yetu; yeye ndiye Mungu wa wokovu wetu.

²⁰Mungu wetu ni Mungu mwenye kutuokoa; Bwana Mungu pekee ndiye aokoaye katika kifo.

²¹Mungu ataviponda vichwa vya maadui zake, naam, vichwa vya wanaoshikilia njia mbaya.

²²Bwana alisema: “Nitawarudisha maadui kutoka Bashani; nitawarudisha kutoka vilindi vya bahari,

²³uoshe miguu katika damu ya maadui zako, nao mbwa wako wale shibe yao.”

²⁴Ee Mungu, misafara yako ya ushindi yaonekana; misafara ya Mungu wangu, mfalme wangu, hadi patakatifu pake!

²⁵Mbele waimbaji, nyuma wanamuziki, katikati wasichana wanavumisha vigoma.

²⁶“Msifuni Mungu katika jumuiya kubwa ya watu. Msifuni Mwenyezi-Mungu, enyi wazawa wa Israeli!”

²⁷Kwanza ni Benyamini, mdogo wa wote; kisha viongozi wa Yuda na kundi lao, halafu wakuu wa Zebuluni na Naftali.

²⁸Onesha, ee Mungu, nguvu yako kuu; enzi yako uliyotumia kwa ajili yetu,

²⁹kutoka hekaluni mwako, Yerusalemu, ambapo wafalme watakujia na zawadi zao.

³⁰Uwakemee wale wanyama wakaao bwawani, kundi la mabeberu na fahali, mpaka mataifa hayo yakupe heshima na kodi. Uwatawanye hao watu wenye kupenda vita![35]

³¹Mabalozi[36] watakuja kutoka Misri, Waethiopia watamletea Mungu mali zao.[37]

³²Enyi falme za dunia, mwimbieni Mungu, mwimbieni Bwana nyimbo za sifa;

³³mwimbieni yeye apitaye katika mbingu, mbingu za kale na kale. Msikilizeni akinguruma kwa kishindo.

³⁴Itambueni nguvu kuu ya Mungu; yeye atawala juu ya Israeli, enzi yake yafika katika mbingu.

³⁵Mungu ni wa kutisha patakatifuni pake, naam, yeye ni Mungu wa Israeli! Huwapa watu wake nguvu na enzi. Asifiwe Mungu!