Read Swahilli Zaburi 73 Bible Online

Zaburi 73 - Swahilli bible

Zaburi 73

¹(Zaburi ya Asafu) Hakika, Mungu ni mwema kwa watu wanyofu; ni mwema kwa walio safi moyoni.

²Karibu sana ningejikwaa, kidogo tu ningeteleza;

³maana niliwaonea wivu wenye kiburi, nilipoona wakosefu wakifanikiwa.

⁴Maana hao hawapatwi na mateso; miili yao ina afya na wana nguvu.

⁵Taabu za binadamu haziwapati hao; hawapati mateso kama watu wengine.

⁶Kiburi kimekuwa mkufu wao shingoni, uhasama ni kama nguo yao.

⁷Macho yao hufura kwa uovu; mioyo yao hububujika mipango mibaya.

⁸Huwadhihaki wengine na kusema mabaya; hujivuna na kupanga kufanya uhasama.

⁹Kwa vinywa vyao hutukana mbingu; kwa ndimi zao hujitapa duniani.

¹⁰Hata watu wa Mungu wanawafuata, hawaoni kwao chochote kibaya[38] na kusadiki kila wanachosema.

¹¹Wanasema: “Mungu hawezi kujua! Mungu Mkuu hataweza kugundua!”

¹²Hivi ndivyo watu waovu walivyo; wana kila kitu na wanapata mali zaidi.

¹³Je, nimetunza bure usafi moyoni, na kujilinda nisitende dhambi?

¹⁴Mchana kutwa nimepata mapigo, kila asubuhi nimepata mateso.

¹⁵Kama ningalisema hayo kama wao, ningalikuwa mhaini miongoni mwa watu wako.

¹⁶Basi, nilijaribu kufikiria jambo hili, lakini lilikuwa gumu mno kwangu,

¹⁷mpaka nilipoingia patakatifu pako. Ndipo nikatambua yatakayowapata waovu.

¹⁸Kweli wewe wawaweka mahali penye utelezi; wawafanya waanguke na kuangamia.

¹⁹Wanaangamizwa ghafla, na kufutiliwa mbali kwa vitisho.

²⁰Ee Bwana, uinukapo, wao hutoweka mara, kama ndoto wakati mtu anapoamka asubuhi.

²¹Nilipoona uchungu moyoni na kuchomwa rohoni,

²²nilikuwa mpumbavu na mjinga, nilikuwa kama mnyama mbele yako.

²³Hata hivyo niko daima nawe, ee Mungu! Wanishika mkono na kunitegemeza.

²⁴Wewe waniongoza kwa mashauri yako; mwishowe utanipokea kwenye utukufu.

²⁵Mbinguni, nani awezaye kunisaidia ila wewe? Na duniani hamna ninachotamani ila wewe!

²⁶Hata nikikosa nguvu mwilini na rohoni, wewe, ee Mungu, u mwamba wangu; riziki yangu kuu ni wewe milele.

²⁷Anayejitenga nawe, hakika ataangamia. Anayekukana, utamwangamiza.

²⁸Lakini, kwangu ni vema kuwa karibu na Mungu, wewe Bwana Mwenyezi-Mungu ndiwe usalama wangu. Nitatangaza mambo yote uliyotenda!