Read Swahilli Zaburi 77 Bible Online

Zaburi 77 - Swahilli bible

Zaburi 77

¹(Kwa Mwimbishaji: Mtindo wa Yeduthuni. Zaburi ya Asafu) Namlilia Mungu kwa sauti, kwa sauti namlilia Mungu anisikie.

²Wakati wa taabu namwomba Bwana; namnyoshea mikono yangu usiku bila kuchoka, lakini sipati faraja yoyote kwa mtu.

³Ninamfikiria Mungu na kusononeka; ninatafakari na kufa moyo.

⁴Wanizuia hata kupata lepe la usingizi, nina mahangaiko hata kusema siwezi.

⁵Nafikiria siku za zamani; nakumbuka miaka ya hapo kale.

⁶Usiku nawaza na kuwazua moyoni; natafakari na kujiuliza rohoni:

⁷“Je, Bwana ametuacha kabisa? Je, hatatuonesha tena hisani yake?

⁸Je fadhili zake zimekoma kabisa? Je, hatatimiza tena ahadi zake?

⁹Je, Mungu amesahau kuwa na huruma? Je, hasira yake imeuondoa upole wake?”

¹⁰Kisha nikasema, “Kinachonichoma zaidi ni kwamba, Mungu Mkuu hatendi tena kitu kwa ajili yetu!”

¹¹Nitayakumbuka matendo yako, ee Mwenyezi-Mungu, naam, nitayafikiria maajabu yako ya hapo kale.

¹²Nitatafakari juu ya kazi zako, na kuwaza juu ya matendo yako makuu.

¹³Kila ufanyacho ee Mungu, ni kitakatifu. Ni mungu gani aliye mkuu kama Mungu wetu?

¹⁴Wewe ni Mungu unayetenda maajabu; wewe umeyaonesha mataifa uwezo wako.

¹⁵Kwa mkono wako wa nguvu uliwakomboa watu wako; uliwakomboa wazawa wa Yakobo na Yosefu.

¹⁶Maji yalipokuona, ee Mungu, maji yalipokuona, yaliogopa mno; naam, bahari ilitetemeka hata vilindini.

¹⁷Mawingu yalichuruzika maji, ngurumo zikavuma angani, mishale ya umeme ikaangaza kila upande.

¹⁸Kishindo cha ngurumo yako kilitokea katika kimbunga, umeme wako ukauangaza ulimwengu; dunia ikatikisika na kutetemeka.

¹⁹Wewe uliweka njia yako juu ya bahari; ulitembea juu ya maji yale mengi, lakini nyayo zako hazikuonekana.

²⁰Uliwaongoza watu wako kama kondoo, chini ya uongozi wa Mose na Aroni.