Read Swahilli Zaburi 80 Bible Online

Zaburi 80 - Swahilli bible

Zaburi 80

¹(Kwa Mwimbishaji: Mtindo wa Yungiyungi. Zaburi ya Asafu) Utege sikio, ewe Mchungaji wa Israeli, uwaongozaye wazawa wa Yosefu kama kondoo. Ewe ukaaye juu ya viumbe vyenye mabawa,[46] uangaze,

²mbele ya Efraimu, Benyamini na Manase. Uoneshe nguvu yako, uje kutuokoa!

³Uturekebishe, ee Mungu; utuangalie kwa wema, nasi tutaokoka.

⁴Ee Mwenyezi-Mungu, Mungu wa majeshi, hata lini utazikasirikia sala za watu wako?

⁵Umefanya huzuni iwe chakula chetu; umetunywesha machozi kwa wingi.

⁶Umetufanya tuwe dharau kwa jirani zetu; maadui zetu wanatudhihaki.

⁷Ee Mungu wa majeshi, uturekebishe, utuangalie kwa wema, nasi tutaokoka.

⁸Ulileta mzabibu kutoka Misri; ukawafukuza watu wa mataifa mengine, na kuupanda katika nchi yao.

⁹Uliupalilia upate kukua, nao ukatoa mizizi na kuenea kote nchini.

¹⁰Uliifunika milima kwa kivuli chake, na matawi yake yakawa kama mierezi mikubwa.

¹¹Matawi yake yalienea mpaka baharini; machipukizi yake mpaka kando ya mto Eufrate.

¹²Mbona ulibomoa kuta zilizouzunguka? Sasa kila apitaye anachuma zabibu zake;

¹³nguruwe mwitu wanauharibu, na wanyama wa porini wanautafuna!

¹⁴Utugeukie tena ee Mungu wa majeshi. Uangalie toka mbinguni, uone; ukautunze mzabibu huo.

¹⁵Uulinde mche ulioupanda kwa mkono wako; hilo chipukizi uliloimarisha wewe mwenyewe.

¹⁶Watu walioukata na kuuteketeza, uwatazame kwa ukali, waangamie.

¹⁷Mkono wako umkinge huyo uliyemfadhili; huyo uliyemteua kwa ajili yako.

¹⁸Hatutakuacha na kukuasi tena; utujalie uhai, nasi tutakusifu.

¹⁹Ee Mwenyezi-Mungu wa majeshi uturekebishe; utuangalie kwa wema, nasi tutaokoka.