Read Swahilli Zaburi 89 Bible Online

Zaburi 89 - Swahilli bible

Zaburi 89

¹(Utenzi wa Ethani Mwezrahi) Ee Mwenyezi-Mungu, nitaimba fadhili zako milele; nitavitangazia vizazi vyote uaminifu wako.

²Natamka kuwa fadhili zako zadumu milele; uaminifu wako ni thabiti kama mbingu.

³Umesema: “Nimefanya agano na mteule wangu, nimemwapia mtumishi wangu Daudi:

⁴ ‘Daima nitamweka mzawa wako kuwa mfalme, tena nitaudumisha ufalme wako milele.’”

⁵Mbingu na zisifu maajabu yako, ee Mwenyezi-Mungu; uaminifu wako usifiwe katika kusanyiko la watakatifu.

⁶Nani mbinguni awezaye kulinganishwa nawe ee Mwenyezi-Mungu? Nani aliye sawa nawe kati ya viumbe vya mbinguni?

⁷Wewe waogopwa katika baraza la watakatifu; wote wanaokuzunguka wanatiwa hofu kuu.

⁸Ee Mwenyezi-Mungu, Mungu wa majeshi, ni nani mwenye nguvu kama wewe, ee Mwenyezi-Mungu? Uaminifu umekuzunguka pande zote.

⁹Wewe watawala machafuko ya bahari; mawimbi yake yakiinuka, wayatuliza.

¹⁰Uliliponda joka Rahabu na kuliua; uliwatawanya adui zako kwa nguvu yako.

¹¹Mbingu ni zako na dunia ni yako pia; ulimwengu na vitu vyote vilivyomo wewe uliviumba.

¹²Wewe uliumba kaskazini na kusini; milima Tabori na Hermoni inakusifu kwa furaha.

¹³Mkono wako una nguvu, mkono wako una nguvu na umeshinda!

¹⁴Uadilifu na haki ni msingi wa utawala wako; fadhili na uaminifu vyakutangulia!

¹⁵Heri watu wanaojua kukushangilia, wanaoishi katika mwanga wa wema wako, ee Mwenyezi-Mungu.

¹⁶Wanafurahi mchana kutwa kwa sababu yako, na kukusifu kwa ajili ya uadilifu wako.

¹⁷Wewe ndiwe fahari na nguvu yao; kwa wema wako twapata ushindi.

¹⁸Ee Mwenyezi-Mungu, mlinzi wetu ni wako, mfalme wetu ametoka kwako ewe Mtakatifu wa Israeli.

¹⁹Zamani ulinena katika maono, ukawaambia watumishi wako waaminifu: “Nimempa nguvu shujaa mmoja, nimemkuza huyo niliyemteua kati ya watu.

²⁰ Nimempata Daudi, mtumishi wangu; nimemweka wakfu kwa mafuta yangu matakatifu.

²¹Mkono wangu wa nguvu utakuwa naye daima; mkono wangu mimi mwenyewe utamwimarisha.

²²Maadui hawataweza kumshinda, wala waovu hawatamnyanyasa.

²³Mimi nitawaponda wapinzani wake; nitawaangamiza wote wanaomchukia.

²⁴Nitakuwa mwaminifu kwake na kumfadhili, kwa jina langu atapata ushindi mkubwa.

²⁵Nitaimarisha nguvu na utawala wake, toka bahari hata mito.

²⁶Yeye ataniita: ‘Wewe ni Baba yangu, Mungu wangu, mwamba wa wokovu wangu.’

²⁷ Nami nitamfanya kuwa mzaliwa wangu wa kwanza, mkuu kuliko wafalme wote duniani.

²⁸Fadhili zangu nitamwekea milele, na agano langu kwake litadumu daima.

²⁹Nitaudumisha daima ukoo wake wa kifalme, na ufalme wake kama mbingu.

³⁰“Lakini wazawa wake wakiiacha sheria yangu, wasipoishi kadiri ya maagizo yangu,

³¹kama wakizivunja kanuni zangu, na kuacha kutii amri zangu,

³²hapo nitawaadhibu makosa yao; nitawapiga kwa sababu ya uovu wao.

³³Lakini sitaacha kumfadhili Daudi, wala kuwa mwongo kuhusu uaminifu wangu.

³⁴Sitavunja agano langu naye, wala kubatili neno nililotamka kwa mdomo wangu.

³⁵“Nimeapa mara moja tu kwa utakatifu wangu; nami sitamwambia Daudi uongo.

³⁶Ukoo wake utadumu milele; na ufalme wake kama jua.

³⁷Utadumu milele kama mwezi utokezavyo angani.”

³⁸Lakini sasa ee Mungu, umemtupa na kumkataa, umejaa ghadhabu dhidi ya huyo uliyemweka wakfu.

³⁹Umefuta agano ulilofanya na mtumishi wako; umeitupa taji yake mavumbini.

⁴⁰Kuta zote za mji wake umezibomoa; ngome zake umezivunjavunja.

⁴¹Wote wapitao wanampokonya mali zake; amekuwa dharau kwa jirani zake.

⁴²Maadui zake umewapa ushindi; umewafurahisha maadui zake wote.

⁴³Silaha zake umezifanya butu; ukamwacha ashindwe vitani.

⁴⁴Umemvua madaraka yake ya kifalme[48] ukauangusha chini utawala wake.

⁴⁵Umezipunguza siku za ujana wake, ukamfunika fedheha tele.

⁴⁶Ee Mwenyezi-Mungu, utajificha hata milele? Hata lini hasira yako itawaka kama moto?

⁴⁷Ukumbuke, ee Bwana, ufupi wa maisha yangu; kwamba binadamu uliyemuumba anaishi muda mfupi!

⁴⁸Ni mtu gani aishiye asipate kufa? Nani awezaye kujiepusha na kifo?

⁴⁹Ee Bwana, ziko wapi basi fadhili zako, ulizomwapia Daudi kwa uaminifu wako?

⁵⁰Ee Bwana, ukumbuke anavyotukanwa mtumishi wako, jinsi nivumiliavyo matusi ya wasiokujua.

⁵¹Ona wanavyomzomea, ee Mwenyezi-Mungu; jinsi wanavyomdhihaki mteule wako kila aendako.

⁵²Asifiwe Mwenyezi-Mungu milele! Amina! Amina!