Read Swahilli Zaburi 97 Bible Online

Zaburi 97 - Swahilli bible

Zaburi 97

¹Mwenyezi-Mungu anatawala! Furahi, ee dunia! Furahini enyi visiwa vingi!

²Mawingu na giza nene vyamzunguka; uadilifu na haki ni msingi wa utawala wake.

³Moto watangulia mbele yake, na kuwateketeza maadui zake pande zote.

⁴Umeme wake wauangaza ulimwengu; dunia yauona na kutetemeka.

⁵Milima yayeyuka kama nta mbele ya Mwenyezi-Mungu; naam, mbele ya Bwana wa dunia yote.

⁶Mbingu zatangaza uadilifu wake; na mataifa yote yauona utukufu wake.

⁷Wote wanaoabudu sanamu wanaaibishwa, naam, wote wanaojisifia miungu duni; miungu yote husujudu mbele zake.

⁸Watu wa Siyoni wanafurahi; watu wa Yuda wanashangilia, kwa sababu ya hukumu zako, ee Mungu.

⁹Wewe Mwenyezi-Mungu ni mkuu juu ya dunia yote; wewe watukuka juu ya miungu yote.

¹⁰Mwenyezi-Mungu huwapenda wanaochukia uovu, huyalinda maisha ya watu wake; huwaokoa makuchani mwa waovu.

¹¹Mwanga humwangazia mtu mwadilifu, na furaha kwa watu wanyofu wa moyo.

¹²Furahini kwa sababu ya Mwenyezi-Mungu enyi waadilifu; mshukuruni kwa ajili ya jina lake takatifu.