Read Swahilli Methali 11 Bible Online

Methali 11 - Swahilli bible

Methali 11

¹Mizani ya udanganyifu ni chukizo kwa Mwenyezi-Mungu, lakini matumizi ya kipimo halali ni furaha kwake.

²Kiburi huandamana na fedheha, lakini kwa watu wanyenyekevu mna hekima.

³Unyofu wa watu wema huwaongoza, upotovu wa wenye hila huwaangamiza.

⁴Utajiri haufai kitu siku ya ghadhabu, lakini uadilifu huokoa kutoka kifo.

⁵Uadilifu wa watu wanyofu huinyosha njia yao, lakini waovu huanguka kwa uovu wao wenyewe.

⁶Uadilifu wa wanyofu huwaokoa na hatari, lakini wafitini hunaswa kwa tamaa zao wenyewe.

⁷Mwovu akifa tumaini lake nalo hutoweka; tazamio la asiyemcha Mungu huishia patupu.

⁸Mtu mnyofu huokolewa katika shida, na mwovu huingia humo badala yake.

⁹Asiyemcha Mungu huangamiza wengine kwa mdomo wake, lakini mwadilifu huokolewa kwa maarifa yake.

¹⁰Waadilifu wakipata fanaka mji hushangilia, na waovu wakiangamia watu hupiga vigelegele.

¹¹Mji hufanikishwa kwa baraka za wanyofu, lakini huangamizwa kwa mdomo wa waovu.

¹²Anayemdharau jirani yake hana akili, mtu mwenye busara hukaa kimya.

¹³Apitapitaye akichongea hutoa siri, lakini anayeaminika rohoni huficha siri.

¹⁴Pasipo na uongozi taifa huanguka, penye washauri wengi pana usalama.

¹⁵Anayemdhamini mgeni atakuja juta, lakini anayechukia mambo ya dhamana yu salama.

¹⁶Mwanamke mwema huheshimiwa, mwanamume mwenye bidii hutajirika.

¹⁷Mtu mkarimu hufaidika yeye mwenyewe, lakini mtu mkatili hujiumiza mwenyewe.

¹⁸Faida anayopata mwovu ni ya uongo, lakini atendaye mema hakika atapata faida ya kweli.

¹⁹Mtu anayepania kuwa mwadilifu ataishi, lakini anayechagua kutenda maovu atakufa.

²⁰Wenye nia mbaya ni chukizo kwa Mwenyezi-Mungu, lakini wenye mwenendo mwema ni furaha yake.

²¹Hakika mwovu hataepa kuadhibiwa, lakini waadilifu wataokolewa.

²²Mwanamke mzuri asiye na akili, ni kama pete ya dhahabu puani mwa nguruwe.

²³Matazamio ya waadilifu yana matokeo mema; tamaa za waovu huishia katika ghadhabu.

²⁴Atoaye kwa ukarimu huzidi kutajirika; lakini bahili huzidi kudidimia katika umaskini.

²⁵Mtu mkarimu atafanikishwa, amnyweshaye mwingine maji naye atanyweshwa.

²⁶Watu humlaani afichaye nafaka,[11] lakini humtakia baraka mwenye kuiuza.

²⁷Atafutaye kutenda mema hupata fadhili, lakini atafutaye kutenda maovu atapatwa na maovu.

²⁸Anayetegemea mali zake ataanguka, lakini mwadilifu atastawi kama jani bichi.

²⁹Anayeivunja nyumba yake ataambua upepo. Mpumbavu atakuwa mtumwa wa wenye hekima.

³⁰Matendo ya mwadilifu huleta uhai, lakini uhalifu huuondoa uhai.

³¹ Ikiwa mwadilifu hupata tuzo hapa duniani, hakika mwovu na mwenye dhambi atapatilizwa.