Read Swahilli Methali 21 Bible Online

Methali 21 - Swahilli bible

Methali 21

¹Moyo wa mfalme ni kama maji yanayotiririka; Mwenyezi-Mungu, huuongoza popote apendapo.

²Matendo yote ya mtu ni sawa machoni pake, lakini Mwenyezi-Mungu hupima mioyo.

³Kutenda mambo mema na ya haki, humpendeza Mwenyezi-Mungu kuliko tambiko.

⁴Macho ya kiburi na moyo wa majivuno huonesha wazi dhambi ya waovu.

⁵Mipango ya mtu wa bidii huleta mali kwa wingi, lakini kila aliye na pupa huishia patupu.

⁶Mali ipatikanayo kwa udanganyifu, ni mvuke upitao na mtego wa kifo.

⁷Ukatili wa wakatili utawafutilia mbali, maana wanakataa kutenda yaliyo ya haki.

⁸Njia ya mtu mwenye hatia imepotoka, lakini mwenendo wa mnyofu umenyooka.

⁹Afadhali kuishi pembeni juu ya paa, kuliko kuishi nyumbani na mwanamke mgomvi.

¹⁰Anachopania kutenda mtu mbaya ni uovu; hata kwa jirani yake hana huruma.

¹¹Ukimwadhibu mwenye dhihaka, mjinga hupata hekima; ukimfundisha mwenye hekima, unampatia maarifa.

¹²Mungu Mwadilifu[26] anajua wanayotenda waovu nyumbani kwao; naye atawaangusha na kuwaangamiza.

¹³Anayekataa kusikiliza kilio cha maskini, naye pia hatasikilizwa atakapolilia msaada.

¹⁴Hasira hutulizwa kwa zawadi ya siri; tunu apewayo mtu imefichwa hupooza ghadhabu.

¹⁵Haki ikitekelezwa watu wema hufurahi, lakini watu waovu hufadhaishwa.

¹⁶Anayetangatanga mbali na njia ya busara, atajikuta ametua miongoni mwa wafu.

¹⁷Anayependa anasa atakuwa maskini; anayefikiria tu kula na kunywa hatatajirika.

¹⁸Mwovu atapata pigo ambalo halitampata mtu mwema, mkosefu ataadhibiwa badala ya mnyofu.

¹⁹Afadhali kuishi jangwani, kuliko kukaa na mwanamke mgomvi na msumbufu.

²⁰Nyumbani kwa mwenye busara mna hazina za thamani, lakini mpumbavu huponda mali yake yote.

²¹Anayepania uadilifu na huruma, ataishi maisha marefu na kuheshimiwa.

²²Mwenye hekima aweza kuteka mji wa wenye nguvu, na kuziporomosha ngome wanazozitegemea.

²³Achungaye mdomo wake na ulimi wake, hujiepusha na matatizo.

²⁴Mwenye majivuno na kiburi jina lake ni “Madharau;” matendo yake yamejaa majivuno ya ufidhuli wake.

²⁵Mvivu hufa kwa kutotimizwa tamaa zake, maana mikono yake milegevu haitaki kufanya kazi.

²⁶Mchana kutwa mwovu hutamani kupata kitu, lakini mwadilifu hutoa, tena kwa ukarimu.

²⁷Tambiko ya mwovu ni kitu cha kuchukiza, huchukiza zaidi akiitoa kwa nia mbaya.

²⁸Shahidi mwongo ataangamia, lakini msikivu hawezi kunyamazishwa.

²⁹Mtu mwovu hujionesha kuwa jasiri, lakini mwadilifu huhakikisha ametenda sawa.

³⁰Hakuna hekima, maarifa, wala mawaidha yoyote ya mtu, yawezayo kumshinda Mwenyezi-Mungu.

³¹Farasi hutayarishwa kwa vita, lakini ushindi wamtegemea Mwenyezi-Mungu.