Read Swahilli Methali 23 Bible Online

Methali 23 - Swahilli bible

Methali 23

¹Ukiketi kula pamoja na mtawala, usisahau hata kidogo uko pamoja na nani.

²Zuia sana hamu yako, ikiwa wewe wapenda sana kula.

³Usitamani vyakula vyake vizuri, maana vyaweza kukudanganya.

⁴Ikiwa unayo hekima ya kutosha, usijitaabishe kutafuta utajiri.

⁵Kufumba na kufumbua utajiri hutoweka, huwa kama umepata mabawa ghafla, ukaruka na kutowekea angani kama tai.

⁶Usile chakula cha mtu bahili, wala usitamani mapochopocho yake,

⁷maana moyoni mwake anahesabu unachokula.[27] Atakuambia, “Kula, kunywa!” Lakini moyoni mwake hayuko pamoja nawe.

⁸Utatapika vipande ulivyokula; shukrani zako zote zitakuwa za bure.

⁹Usiseme maneno yako mbele ya mpumbavu, maana atapuuza hekima ya maneno yako.

¹⁰Usiondoe alama ya mpaka wa zamani, wala usiingilie mashamba ya yatima,

¹¹maana Mungu, Mkombozi, ni mwenye nguvu, naye ataitetea haki yao dhidi yako.

¹²Tumia akili zako kufuata mafundisho; tumia masikio yako kusikiliza maarifa.

¹³Usiache kumrudi mtoto; ukimchapa kiboko hatakufa.

¹⁴Ukimtandika kiboko, utayaokoa maisha yake na kuzimu.

¹⁵Mwanangu, moyo wako ukiwa wenye busara, moyo wangu pia utakuwa wenye furaha.

¹⁶Moyo wangu utashangilia, mdomo wako utakaposema maneno yaliyo sawa.

¹⁷Moyo wako usiwaonee wivu wenye dhambi, ila endelea kumcha Mwenyezi-Mungu siku zote.

¹⁸Hakika kuna kesho ya milele, na tumaini lako halitakuwa bure.

¹⁹Sikia mwanangu, uwe na hekima; fikiria sana jinsi unavyoishi.

²⁰Usiwe mmoja wa walevi wa divai, wala walafi wenye kupenda nyama,

²¹maana walevi na walafi wataishia kuwa maskini, anayetumia siku yake kusinzia atavaa matambara.

²²Msikilize baba yako aliyekuzaa, wala usimdharau mama yako akizeeka.

²³Nunua ukweli, wala usiuuze; nunua hekima, mafunzo na busara.

²⁴Baba wa mtoto mwadilifu atajaa furaha; anayemzaa mtoto mwenye hekima atamfurahia.

²⁵Wafurahishe baba na mama yako; mama aliyekuzaa na afurahi.

²⁶Mwanangu, nisikilize kwa makini, shikilia mwenendo wa maisha yangu.

²⁷Malaya ni shimo refu la kutega watu; mwanamke mgeni ni kama kisima chembamba.

²⁸Yeye hunyemelea kama mnyanganyi, husababisha wanaume wengi kukosa uaminifu.

²⁹Ni nani wapigao yowe? Ni nani wenye huzuni? Ni nani wenye ugomvi? Ni nani walalamikao? Ni nani wenye majeraha bila sababu? Ni nani wenye macho mekundu?

³⁰Ni wale ambao hawabanduki penye divai, wale wakaao chonjo kuonja divai iliyokolezwa.

³¹Usiitamani divai hata kwa wekundu wake, hata kama inametameta katika bilauri, na kushuka taratibu unapoinywa.

³²Mwishowe huuma kama nyoka; huchoma kama nyoka mwenye sumu.

³³Macho yako yataona mauzauza, moyo wako utatoa mambo yaliyopotoka.

³⁴Utakuwa kama mtu alalaye katikati ya bahari, kama mtu alalaye juu ya mlingoti wa meli.

³⁵Utasema, “Walinichapa, lakini sikuumia; walinipiga, lakini sina habari. Nitaamka lini? Ngoja nitafute kinywaji kingine!”