Read Swahilli Methali 28 Bible Online

Methali 28 - Swahilli bible

Methali 28

¹Waovu hukimbia japo hawafukuzwi na mtu, lakini waadilifu ni hodari kama simba.

²Taifa la fujo huzusha viongozi wengi, lakini kwa kiongozi mmoja mwenye akili na maarifa huwa na utengemano

³Mtu mhitaji anayewadhulumu maskini, amefanana na mvua kubwa inayoharibu mimea.

⁴Watu wanaovunja sheria huwasifu waovu, lakini wanaoishika sheria hupingana nao.

⁵Waovu hawajui maana ya haki, lakini wamchao Mwenyezi-Mungu wanaielewa kabisa.

⁶Afadhali maskini aishiye kwa unyofu, kuliko tajiri aishiye kwa upotovu.

⁷Mtoto ashikaye sheria ni mwenye hekima, lakini rafiki wa walafi humwaibisha baba yake.

⁸Aongezaye mali yake kwa riba na kutoza faida anamkusanyia mwingine mwenye kuwahurumia maskini.

⁹Anayekataa kuisikia sheria, huyo hata sala yake ni chukizo kwa Mungu.

¹⁰Anayemshawishi mtu mwema kutenda mabaya, ataanguka katika shimo lake mwenyewe. Wasio na hatia wamewekewa mema yao.

¹¹Tajiri hujiona mwenyewe kuwa mwenye hekima, lakini maskini mwenye busara atamfichua.

¹²Watu wema wakipata madaraka maisha hufana, lakini waovu wakitawala watu hujificha.

¹³Afichaye makosa yake hatafanikiwa; lakini anayeungama na kuyaacha atapata rehema.

¹⁴Heri mtu amchaye Mwenyezi-Mungu daima; lakini mkaidi wa moyo ataangukia maafa.

¹⁵Mtawala mwovu anayewatawala maskini, ni kama simba angurumaye au dubu anayeshambulia.

¹⁶Mtawala asiye na akili ni mdhalimu mkatili; lakini achukiaye mali ya udanganyifu atatawala muda mrefu.

¹⁷Mtu anayelemewa na hatia ya kuua mtu, atakuwa mkimbizi mpaka kaburini; mtu yeyote na asijaribu kumzuia.

¹⁸Aishiye kwa unyofu atasalimishwa, lakini mdanganyifu ataanguka kabisa.

¹⁹Anayelima shamba lake atapata chakula kingi, bali anayefuata yasiyofaa atapata umaskini tele.

²⁰Mtu mwaminifu atapata baraka tele, lakini mwenye pupa ya kuwa tajiri hataepa adhabu.

²¹Si vizuri kumbagua mtu; watu hufanya mabaya hata kwa kipande cha mkate.

²²Mtu bahili hukimbilia mali, wala hajui kwamba ufukara utamjia.

²³Amwonyaye mwenzake hatimaye hupata mema zaidi, kuliko yule anayembembeleza kwa maneno matamu.

²⁴ Anayeiba mali ya baba yake au mama yake, akasema si kosa, hana tofauti yoyote na wezi wengine.

²⁵Mchoyo huchochea ugomvi, lakini anayemtegemea Mwenyezi-Mungu atafanikiwa.

²⁶Anayetegemea akili yake mwenyewe ni mpumbavu; lakini anayeishi kwa hekima atakuwa salama.

²⁷Aliye mkarimu kwa maskini hatatindikiwa kitu, lakini anayekataa kuwaangalia atalaaniwa kwa wingi.

²⁸Waovu wakitawala watu hujificha, lakini wakiangamia, waadilifu huongezeka.