Read Swahilli Methali 29 Bible Online

Methali 29 - Swahilli bible

Methali 29

¹Anayeonywa mara nyingi akawa mkaidi, ataangamia ghafla asipone tena.

²Waadilifu wakitawala watu hufurahi, lakini waovu wakitawala watu hulalamika.

³Apendaye hekima humfurahisha baba yake; lakini aandamanaye na malaya hufuja mali yake.

⁴Mfalme akitumia haki huipatia nchi uthabiti, lakini akipenda hongo taifa huangamia.

⁵Mwenye kumbembeleza jirani yake, anatega mtego wa kujinasa mwenyewe.

⁶Mtu mbaya hunaswa kwa kosa lake, lakini mtu mwadilifu huimba na kufurahi.

⁷Mwadilifu anajua haki za maskini, lakini mtu mwovu hajui mambo hayo.

⁸Wenye dharau huutia vurugu mji mzima, lakini wenye hekima hutuliza ghadhabu.

⁹Mwenye hekima akibishana na mpumbavu, mpumbavu huwaka hasira na kucheka bila kutulia.

¹⁰Wapendao kumwaga damu humchukia mtu asiye na hatia, lakini watu wema huyalinda maisha yake.

¹¹Mpumbavu huonesha hasira yake wazi, lakini mwenye hekima huizuia na kuituliza.

¹²Mtawala akisikiliza mambo ya uongo, maofisa wake wote watakuwa waovu.

¹³Maskini na mkandamizaji wanafanana kwa kitu kimoja: Wote wawili wamepewa macho na Mwenyezi-Mungu.

¹⁴Mfalme anayewaamua maskini kwa haki, atauona utawala wake umeimarika milele.

¹⁵Adhabu na maonyo huleta hekima, lakini mtoto aliyeachwa afanye apendavyo humwaibisha mama yake.

¹⁶Waovu wakitawala maovu huongezeka, lakini waadilifu watashuhudia kuanguka kwao.

¹⁷Mpe nidhamu mwanao naye hatakupa wasiwasi; yeye ataufurahisha moyo wako.

¹⁸Pasipo maono ya kinabii watu hukosa nidhamu; heri mtu yule anayeshika sheria.

¹⁹Mtumwa haonyeki kwa maneno matupu, maana ingawa anayaelewa yeye hatayatii.

²⁰Wamwona mtu apayukaye bila kufikiri? Mtu mpumbavu ni afadhali kuliko yeye.

²¹Ambembelezaye mtumwa wake tangu utoto, mwishowe mtumwa huyo atamrithi.[35]

²²Mwenye ghadhabu huchochea ugomvi, mtu wa hasira husababisha makosa mengi.

²³Kiburi cha mtu humporomosha mwenyewe, lakini mnyenyekevu wa roho atapata heshima.

²⁴Anayeshirikiana na mwizi anajidhuru mwenyewe; husikia laana ya aliyeonewa bila kusema neno.

²⁵Kuwaogopa watu ni kujitega mwenyewe, lakini anayemtumaini Mwenyezi-Mungu yu salama.

²⁶Wengi hupenda kujipendekeza kwa mtawala, hali mtu hupata haki yake kwa Mwenyezi-Mungu.

²⁷Mdhalimu ni chukizo kwa mnyofu, naye mnyofu ni chukizo kwa mwovu.