Read Swahilli Methali 6 Bible Online

Methali 6 - Swahilli bible

Methali 6

¹Mwanangu, kama umejitolea kumdhamini jirani yako, ikiwa umetoa ahadi yako kwa ajili ya mtu huyo,

²umejibana kwa maneno yako mwenyewe, umejinasa kwa ahadi uliyofanya.

³Ujue kwamba uko chini ya mamlaka ya mwenzio, lakini mwanangu, ukitaka kujiokoa, basi fanya hivi: Mwendee mtu huyo mara moja umsihi akupe uhuru wako.

⁴Jitahidi usiache macho yako yapate usingizi, wala kope za macho yako zisinzie.

⁵Jiokoe kwa kujitoa katika mtego huo, mithili ya paa ama ndege amtorokavyo mwindaji.

⁶Ewe mvivu! Hebu ukamchungulie sisimizi, fikiria namna yake ya kuishi ukapate hekima.

⁷Sisimizi hana kiongozi, ofisa, wala mtawala;

⁸lakini hujiwekea chakula wakati wa kiangazi, hujikusanyia akiba wakati wa mavuno.

⁹Ewe mvivu, utalala hapo mpaka lini? Utaamka lini katika usingizi wako?

¹⁰Wasema: “Acha nilale kidogo tu, acha nisinzie kidogo! Niache nikunje mikono nipumzike kidogo!”

¹¹Wakati huo umaskini utakuvamia kama mnyanganyi, ufukara utakufuata kama jambazi.[4]

¹²Mtu mwovu, mtu asiyefaa kitu, huzururazurura akisema maneno mapotovu.

¹³Hukonyeza jicho kuwakosesha wengine, huparuza kwa nyayo, na kuashiria watu kwa vidole.

¹⁴Akiwa amejaa ulaghai moyoni hutunga maovu, huzusha ugomvi kila mahali.

¹⁵Kutokana na hayo maafa yatamvamia ghafla, ghafla atadhurika vibaya asiweze kupona tena.

¹⁶Kuna vitu sita anavyochukia Mwenyezi-Mungu; naam, vitu saba ambavyo ni chukizo kwake:

¹⁷Macho ya kiburi, ulimi mdanganyifu, mikono inayoua wasio na hatia,

¹⁸moyo unaopanga mipango miovu, miguu iliyo mbioni kutenda maovu,

¹⁹shahidi wa uongo abubujikaye uongo, na mtu achocheaye fitina kati ya ndugu.

²⁰Mwanangu, shika maagizo ya baba yako, wala usisahau mafundisho ya mama yako;

²¹yaweke daima moyoni mwako, yafunge shingoni mwako.

²²Yatakuongoza njiani mwako, yatakulinda wakati ulalapo, yatakushauri uwapo macho mchana.

²³Maana amri hiyo ni taa, na sheria hiyo ni mwanga. Maonyo hayo na nidhamu yatuweka njiani mwa uhai.

²⁴Yatakulinda mbali na mwanamke mbaya, yatakuepusha na maneno matamu ya mwanamke mgeni.[5]

²⁵Usimtamani mwanamke huyo kwa uzuri wake, wala usikubali kunaswa kwa kope za macho yake.

²⁶Mtu hupoteza kipande cha mkate kwa malaya, lakini kwa mke wa mtu mwingine utapoteza uhai wako wote.

²⁷Je, waweza kuweka moto kifuani na nguo zako zisiungue?

²⁸Je, waweza kukanyaga makaa ya moto na nyayo zako zisiungue?

²⁹Ndivyo alivyo mwanamume alalaye na mke wa mwenzake; yeyote anayemgusa mwanamke huyo hataacha kuadhibiwa.

³⁰Watu hawambezi sana mtu akiiba kwa sababu ya njaa;

³¹lakini akipatikana lazima alipe mara saba; tena atatoa mali yote aliyo nayo.

³²Mwanamume anayezini na mke wa mtu hana akili kabisa; huyo hujiangamiza yeye mwenyewe.

³³Atapata majeraha na madharau; fedheha atakayopata haitamtoka.

³⁴Maana wivu wa mume humfanya kuwa mkali kabisa; wakati atakapolipiza kisasi hana cha kuhurumia.

³⁵Hatakubali fidia yoyote; wala kutulizwa na zawadi zako nyingi.