Read Swahilli Isaya 24 Bible Online

Isaya 24 - Swahilli bible

Isaya 24

¹Sasa Mwenyezi-Mungu anaiharibu dunia na kuifanya tupu. Atausokota uso wa dunia na kuwatawanya wakazi wake.

²Kila mtu atapatwa na mambo yaleyale: Mtu wa kawaida na kuhani; mtumwa na bwana wake; mjakazi na bibi yake; mnunuzi na mwuzaji; mkopeshaji na mkopaji; mdai na mdaiwa.

³Dunia itaharibiwa kabisa na kuangamizwa; Mwenyezi-Mungu ametamka hayo.

⁴Dunia inakauka na kunyauka; ulimwengu unafadhaika na kunyauka; mbingu zinafadhaika pamoja na dunia.

⁵Watu wameitia najisi dunia maana wamezivunja sheria za Mungu, wamezikiuka kanuni zake, wamelivunja agano lake la milele.

⁶Kwa sababu hiyo laana inaitokomeza dunia, wakazi wake wanateseka kwa makosa yao. Wakazi wa dunia wamepungua, ni watu wachache tu waliosalia.

⁷Mizabibu inanyauka, divai inakosekana. Wote waliokuwa wenye furaha sasa wanasononeka kwa huzuni.

⁸Mdundo wa vigoma umekoma, nderemo na vifijo vimetoweka; midundo ya vinubi imekomeshwa.

⁹Hakuna tena kunywa divai na kuimba; mvinyo umekuwa mchungu kwa wanywaji.

¹⁰Mji uliohamwa umejaa uharibifu; kila nyumba imefungwa asiingie mtu.

¹¹Kuna kilio barabarani kwa kukosa divai; shangwe yote imekoma, furaha imetoweka duniani.

¹²Mji ni magofu matupu; malango yake yamevunjwavunjwa.

¹³Kama vile zeituni chache tu juu ya mzeituni au tini chache tu juu ya mtini baada ya kumaliza mavuno, ndivyo itakavyokuwa katika nchi zote: Watu wachache watabakia hai.

¹⁴Watakaosalia watapaza sauti, wataimba kwa shangwe. Kutoka magharibi watatangaza ukuu wa Mwenyezi-Mungu,

¹⁵nao wakazi wa mashariki watamsifu. Watu wa mbali watalisifu jina la Mwenyezi-Mungu, Mungu wa Israeli.

¹⁶Tunasikia nyimbo za sifa kutoka miisho ya dunia, nyimbo za kumsifu Mungu aliye mwadilifu. Lakini mimi ninanyongonyea, naam, ninanyongonyea. Ole wangu mimi! Wasaliti wanaendelea kuwa wasaliti, usaliti wao unazidi kuwa mbaya zaidi.

¹⁷Hofu, mashimo na mitego, hivi ndivyo vinavyowangojeni enyi wakazi wa dunia.

¹⁸Atakayeikimbia hofu atatumbukia shimoni; atakayetoka shimoni atanaswa mtegoni. Madirisha ya mbinguni[26] yamefunguliwa, misingi ya dunia inatikisika.

¹⁹Dunia inavunjikavunjika, inapasuka na kutikiswatikiswa.

²⁰Inapepesuka kama mlevi, inayumbayumba kama kibanda. Imelemewa na mzigo wa dhambi zake nayo itaanguka wala haitainuka tena.

²¹Siku ile Mwenyezi-Mungu ataliadhibu jeshi la angani[27] kadhalika na wafalme wa duniani.

²²Wote watakusanywa kama wafungwa shimoni; watafungwa gerezani pamoja kwa miaka mingi, na baada ya muda huo atawaadhibu.

²³Kisha mwezi utaaibishwa, nalo jua litaona aibu kuangaza, kwa kuwa Mwenyezi-Mungu wa majeshi atatawala huko Yerusalemu katika mlima Siyoni; ataonesha wazee wa watu wake utukufu wake.