Read Swahilli Ezekieli 27 Bible Online

Ezekieli 27 - Swahilli bible

Ezekieli 27

¹Neno la Mwenyezi-Mungu lilinijia:

²“Sasa ewe mtu, imba utenzi huu wa maombolezo juu ya mji wa Tiro,

³mji ule kando ya bahari, unaofanya biashara na mataifa ya pwani. Uambie: Bwana Mwenyezi-Mungu asema hivi: Ewe Tiro, wewe umejigamba u mzuri kwelikweli!

⁴Mipaka yako imeenea kwelikweli! Umejengwa kama meli nzuri.

⁵Wajenzi wako walitumia misonobari kutoka Seniri kupasua mbao zako zote; walichukua mierezi kutoka Lebanoni kukutengenezea mlingoti.

⁶Walichukua mialoni toka Bashani wakakuchongea makasia yako; walikitengenezea silaha kwa misonobari ya kisiwa cha Kupro, na kuipamba kwa pembe.

⁷Kitani kilichotariziwa kutoka Misri kilikuwa kwa kupamba tanga lako na kwa ajili ya bendera yako. Chandarua chako kilitengenezwa kwa rangi ya samawati na urujuani kutoka visiwa vya Elisha.

⁸Watu wa Sidoni na Arvadi walikuwa wapiga makasia wako. Wenye hekima wako walikuwa ndani wakifanya kazi kama wanamaji.

⁹Wazee wa Gebali na mafundi wao walikuwa kwako kuziba nyufa zako. Mabaharia waliokuwa wakipitia kwako walifanya biashara nawe.

¹⁰Watu kutoka Persia, Ludi na Puti walijiunga katika jeshi lako; walirundika kwenye kambi zao za jeshi ngao zao na kofia zao. Wanajeshi hao walikupatia fahari.

¹¹Watu wa Arvadi na wa Hele na jeshi lao walilinda kuta zako pande zote, nao watu wa Gamadi walilinda minara yako. Walitundika ngao zao kwenye kuta zako pande zote, na hivyo wakaukamilisha uzuri wako.

¹²Watu wa Tarshishi walifanya biashara nawe kwa sababu ya utajiri wako mwingi na wa kila namna. Walitoa fedha, chuma, bati, na risasi kupata bidhaa zako.

¹³Watu wa Yavani, Tubali na Mesheki, walifanya biashara nawe, wakakupatia watumwa na vifaa vya shaba wapate bidhaa zako.

¹⁴Bidhaa zako uliziuza huko Beth-togarma ili kujipatia farasi wa mizigo na wa vita, ngamia na nyumbu.

¹⁵Watu wa Dedani[35] walifanya biashara nawe. Nchi nyingi za pwani zilikuwa masoko yako maalumu. Watu wake walikuletea pembe za ndovu na mipingo kulipia bidhaa zako.

¹⁶Watu wa Edomu[36] walifanya biashara nawe kwa sababu ya wingi wa bidhaa zako. Kwa kupata bidhaa zako walikupa akiki, vitambaa vya urujuani, vitambaa vilivyonakshiwa, kitani safi, matumbawe na yakuti.

¹⁷Hata watu wa Yuda na Israeli walifanya biashara nawe; walikupa ngano,[37] zeituni, tini za mwanzoni, asali, mafuta na marhamu kulipia bidhaa zako.

¹⁸Watu wa Damasko walifanya biashara nawe kwa sababu ya wingi wa bidhaa zako; walikupa divai kutoka Helboni na sufu nyeupe.

¹⁹Vedani na Yavani walisafirisha bidhaa zako toka Uzali; hata chuma kilichofuliwa, mdalasini na mchaichai ili kupata bidhaa zako.

²⁰Watu wa Dedani walifanya biashara nawe kwa kukupatia matandiko ya farasi.

²¹Waarabu na wakuu wote wa nchi ya Kedari walikuwa wachuuzi wako wakuu katika biashara ya wanakondoo, kondoo madume na mbuzi.

²²Wachuuzi wa Sheba na wa Rama walifanya biashara nawe; walikuletea viungo vya chakula, vito vya thamani na dhahabu kujipatia bidhaa zako safi.

²³Wakazi wa miji ya Harani, Kane na Edeni na wachuuzi wa Ashuru na Kilmadi walifanya biashara nawe.

²⁴Hao walifanya nawe biashara ya mavazi ya fahari, nguo za buluu zilizotariziwa, mazulia ya rangi angavu vifundo na kamba zilizosokotwa imara.

²⁵ Merikebu za Tarshishi ndizo zilikusafirishia bidhaa zako. Basi kama meli katikati ya bahari wewe ulikuwa umejaa shehena.

²⁶Wapiga makasia wako walikupeleka mbali baharini. Upepo wa mashariki umekuvunjavunja ukiwa mbali katikati ya bahari.

²⁷Utajiri wako wa bidhaa na mali, wanamaji wako wote chomboni, mafundi wako wa meli na wachuuzi wako, askari wako wote walioko kwako, pamoja na wasafiri walioko kwako, wote wataangamia baharini, siku ile ya kuangamizwa kwako.

²⁸Mlio wa mabaharia wako utakaposikika, nchi za pwani zitatetemeka.

²⁹Hapo wapiga makasia wote wataziacha meli zao. Wanamaji na manahodha watakaa pwani.

³⁰Wataomboleza kwa uchungu wa moyo juu yako, na kulia kwa uchungu mkubwa; watajitupia mavumbi vichwani mwao na kugaagaa kwenye majivu.

³¹Wamejinyoa vichwa kwa ajili yako na kuvaa mavazi ya gunia. Watalia kwa uchungu wa moyo juu yako.

³²Wataimba wimbo wa ombolezo juu yako; ‘Nani aliyepata kuangamizwa kama Tiro katikati ya bahari?’

³³Bidhaa zako zilipowasili nchi za ngambo, ulitosheleza mahitaji ya watu wengi! Kwa wingi wa utajiri wa bidhaa zako uliwatajirisha wafalme wa dunia.

³⁴Lakini sasa umevunjikia baharini; umeangamia katika vilindi vya maji. Shehena yako na jamii ya mabaharia vimezama pamoja nawe.

³⁵Wakazi wote wa visiwani wamepigwa na bumbuazi juu yako; wafalme wao wameogopa kupindukia, nyuso zimekunjamana kwa huzuni.

³⁶Wachuuzi wa mataifa watakufyonya! Umeufikia mwisho wa kutisha, na hutakuwapo tena milele!”