Read Swahilli Hesabu 34 Bible Online

Hesabu 34 - Swahilli bible

Hesabu 34

¹Mwenyezi-Mungu akamwambia Mose,

²“Waamuru Waisraeli ukisema: Mtakapoingia Kanaani, nchi ambayo ninawapa iwe nchi yenu, mipaka ya eneo lenu lote itakuwa kama ifuatavyo.

³Upande wa kusini mpaka wenu utakuwa kutoka jangwa la Sini kupitia upande wa Edomu. Utaanzia mashariki upande wa kusini mwisho wa Bahari ya Chumvi.

⁴Kisha utapinda kusini kuelekea pito la Akrabimu na kupitia Sini hadi Kadesh-barnea, upande wa kusini. Kutoka hapo, mpaka utapinda kuelekea kaskazini-magharibi hadi Hasar-adari na kupita hadi Azmoni.

⁵Kutoka Azmoni utapinda kuelekea kijito cha Misri kwenye mpaka wa Misri na kuishia bahari ya Mediteranea.

⁶“Mpaka wenu wa upande wa magharibi utakuwa bahari ya Mediteranea.

⁷“Mpaka wenu wa upande wa kaskazini utakuwa kama ifuatavyo: Kutoka bahari ya Mediteranea, mtatia alama hadi Mlima Hori.

⁸Kutoka Mlima Hori mtatia alama hadi pito la Hamathi, na kuendelea hadi Sedadi,

⁹na kupita hadi Zifroni na kuishia Hazar-enani; huo utakuwa mpaka wenu wa kaskazini.

¹⁰“Mpaka wenu wa upande wa mashariki mtauweka kutoka Hazar-enani hadi Shefamu.

¹¹Kutoka Shefamu utaelekea kusini hadi Ribla, mashariki mwa Aini; kisha mpaka huo utakwenda chini hadi mteremko wa mashariki wa ziwa Kinerethi,[20]

¹²halafu utateremka kufuata mto Yordani hadi Bahari ya Chumvi; hii ndiyo itakuwa nchi yako kama mpaka ulivyo.”

¹³ Basi, Mose akawaambia Waisraeli, “Hii ndiyo nchi mtakayoirithi kwa kupiga kura, nchi ambayo Mwenyezi-Mungu ameagiza yapewe makabila tisa na nusu.

¹⁴Kabila la Reubeni na la Gadi, na nusu ya kabila la Manase yamepata urithi wao kulingana na koo zao.

¹⁵Makabila hayo mawili na nusu yamepata urithi wao ngambo ya mto Yordani upande wa mashariki, mkabala wa Yeriko, mawioni.”

¹⁶Mwenyezi-Mungu akamwambia Mose,

¹⁷“Kuhani Eleazari na Yoshua mwana wa Nuni ndio watakaowagawia watu nchi kuwa mali yao.

¹⁸Utachukua pia kiongozi mmoja kutoka kila kabila kusaidia katika ugawaji wa nchi.

¹⁹Haya ndiyo majina yao: Kabila la Yuda, Kalebu mwana wa Yefune.

²⁰Kabila la Simeoni, Shemueli mwana wa Amihudi.

²¹Kabila la Benyamini, Elidadi mwana wa Kisloni.

²²Kabila la Dani, Buki mwana wa Yogli.

²³Kabila la Manase mwanawe Yosefu, Hanieli mwana wa Efodi.

²⁴Kabila la Efraimu, mwanawe Yosefu, Kemueli mwana wa Shiftani.

²⁵Kabila la Zebuluni, Elisafani mwana wa Parnaki.

²⁶Kabila la Isakari, Paltieli mwana wa Azani.

²⁷Kabila la Asheri, Ahihudi mwana wa Shelomi

²⁸Kabila la Naftali, Pedaheli mwana wa Amihudi.

²⁹Hawa ndio watu ambao Mwenyezi-Mungu aliwaamuru wawagawie Waisraeli nchi ya Kanaani kuwa mali yao.”