Read Swahilli Waroma 12 Bible Online

Waroma 12 - Swahilli bible

Waroma 12

¹Kwa hiyo, ndugu zangu, maadamu Mungu ni mwenye huruma nyingi, nawasihi kwa moyo wote: Mtoleeni Mungu miili yenu kama tambiko iliyo hai, takatifu na yenye kupendeza. Hii ndiyo njia yenu halisi ya kumwabudu.

²Msiige mitindo ya ulimwengu huu, bali Mungu afanye mabadiliko ndani yenu kwa kuzigeuza fikira zenu. Hapo ndipo mtakapoweza kuyajua mapenzi ya Mungu na kutambua jambo lililo jema, linalompendeza na kamilifu.

³Kutokana na neema aliyonijalia Mungu, nawaambieni nyinyi nyote: Msijione kuwa ni kitu zaidi kuliko mnavyopaswa kuwa. Fikira zenu na ziwe na kiasi kadiri ya kipimo cha imani Mungu aliyomgawia kila mmoja.

⁴Mwili una viungo vingi, kila kimoja na kazi yake.

⁵Hali kadhalika ingawa sisi ni wengi, tu mwili mmoja kwa kuungana na Kristo, na kila mmoja ni kiungo cha mwenzake.

⁶Basi, tunavyo vipaji mbalimbali kadiri ya neema tuliyopewa. Mwenye kipaji cha unabii na akitumie kadiri ya imani yake.

⁷Mwenye kipaji cha utumishi na atumikie. Mwenye kipaji cha kufundisha na afundishe.

⁸Mwenye kipaji cha kuwafariji wengine na afanye hivyo. Mwenye kumgawia mwenzake alicho nacho na afanye hivyo kwa ukarimu. Msimamizi na asimamie kwa bidii; naye mwenye kutenda jambo la huruma na afanye hivyo kwa furaha.

⁹Mapendo yenu na yawe bila unafiki wowote. Chukieni jambo lolote ovu, zingatieni jema.

¹⁰Pendaneni kindugu; kila mmoja amfikirie kwanza mwenzake kwa heshima.

¹¹Msilegee katika bidii, ila muwe wachangamfu rohoni katika kumtumikia Bwana.

¹²Tumaini lenu liwaweke daima wenye furaha; muwe na saburi katika shida, na kusali daima.

¹³Wasaidieni watu wa Mungu katika mahitaji yao; wapokeeni wageni kwa ukarimu.

¹⁴Watakieni baraka wote wanaowadhulumu nyinyi; naam, watakieni baraka na wala msiwalaani.

¹⁵Furahini pamoja na wenye kufurahi, lieni pamoja na wenye kulia.

¹⁶Ishini kwa kupatana vema nyinyi kwa nyinyi. Msijitakie makuu, bali jishughulisheni na madogo. Msijione kuwa wenye hekima sana.

¹⁷Msilipe ovu kwa ovu. Zingatieni mambo mema mbele ya wote.

¹⁸Kadiri inavyowezekana kwa upande wenu, muwe na amani na watu wote.

¹⁹Wapenzi wangu, msilipize kisasi, bali mwachieni Mungu jambo hilo; maana Maandiko Matakatifu yasema: “Kulipiza kisasi ni shauri langu; mimi nitalipiza, asema Bwana.”

²⁰Zaidi ya hayo, Maandiko yasema: “Adui yako akiwa na njaa, mpe chakula; akiwa na kiu, mpe kinywaji. Maana kwa kufanya hivyo utamfanya apate aibu kali kama makaa ya moto juu ya kichwa chake.”

²¹Usikubali kushindwa na ubaya, bali ushinde ubaya kwa wema.